История России - История России до конца XVI в.
В лет(о) 6961. 1Взят(ь)е Ц(а)рю градоу от безбожнаго Магмета Амуратова с(ы)на салтана.
Властвующу турки безб(о)жьномоу Магмету Амуратову с(ы)ну, и бывыи тогда в миру в докончании православным ц(а)ремъ Костянтиномъ Ивановичем, ц(а)рствующему во Ц(а)риграде. И абие безбожныи Магметъ брань воздвиже противу Костянтина града не по чиноу, но сопротиву сотвореных сложеных клятвъ, воинство приведе много по земли и по морю, и ратовати нача, и пришед внезапу, град обступи со многими силами. Ц(а)рь ж(е) Костянтин с прилучившимис(я) велможами, вси людие града ощутиша его оустремление  и не ведаху, что сотворити, поне(ж)е люцкаго сображ(е)ния во граде не бе, и братия [л. 507 об.] ц(а)р(е)вым несущи ту. И посла ц(а)рь Костянтин к Магометоу салтану посланники, хотя уведати бывшее и о миру гл(агола)ти. Онъ ж(е) окоянныи, и безверныи, и лоукавыи посланники отосла безделныи, а самъ предивнымъ ополчениемъ страшньмъ2 движением по суши и по морю приступи къ ц(а)рствующему граду м(е)с(я)ца декабря. И повеле бити пушками, и пищалми, и стенобитными3 хитростьми, и приступы градцкия уготовляти. Сущи ж(е) во граде людие, греки и фрязовья, выежжа из града, бьяхуся с туркы, не дающие имъ стенобитныя хитрости наряжати, но убо Салтанове силе велице тяжце, сущи грецы не возмогоша имъ никоеяж(е) пакости сотворити, занеж(е) един бияшес(я) с тысящею, а два – со тьмою.
Сие ж(е) оуведав, ц(а)рь Костянтинъ повеле велможам и мегистаном разделити воином градские стены, и стрелницы, и врата. Також(е) и всех людеи колоколы ратные на всех странах изставити, да когждо их ведаеть и хранить свою стену, и вся, яж(е)  на бранную потребу, да устраяеть;  да бьется с турки сь стены, а из града не выходити, ни выежжати. Також(е) и пушки и пищали установити по приступным местомъ на сохранение стенам.
А самъ ц(а)рь Костянтинъ с патриярхом, и съ царицею, и со с(вя)т(ите)ли, и вес(ь) с(вя)щ(е)нныи собор, и множ(е)ство жен и детеи и хожаху по ц(е)рквамъ Б(о)жиим, молбы и моление деюще и гл(аголю)ще; «Г(оспод)и, Г(оспод)и4, страшное [л. 508] Твое существо, неисповедима сила, юж(е) древле горы видевше, востретавше, и тварь потрясеся, » третавше, и тварь потрясея, с(о)лньце ж(е) и лоуна ужасеся, блистание их погибе, и звезды н(е)б(е)сныя спадоша. Мы ж(е), окаяннии, тая вся презревше, согрешихом и безаконновахом пред Тобою, Г(оспод)и, и тмокротно раз[г]невахом и злобихом Твоего Б(о)жества, забывающе Твоих великих даровании и презирающее Твоих повелении, яко неистови; иж(е) на нас м(и)л(о)сти и щедротъ Твоих отвратихомся и на злодияние беззаконие обратихомся, имиж(е) далече от Тебе отступихом вся сия, иж(е) наведе на ны и на град Твоис(вя)тыи и пр(а)в(е)дным истиннымъ, судомъ сотворил еси грех ради наших, и нес(ть) намъ отверсти устъ, что гл(агола)ти; но оубо всепетыи и пребл(а)гословенныи Г(оспод)и, создание и творение есмь Твое и дела рук Твоих, не предаи ж(е) нас до конца врагомъ н(а)шимъ. И не разори достояния Твоег(о), не остави м(и)л(о)сть Твою от нас, ослаби намъ время сие, во еж(е) обратитис(я) намъ и покаятис(я) Твоемоу бл(а)гооутрообию. Сам бо вл(а)д(ы)ко реклъ ес(ть): «Не приидох пр(а)в(е)дники сп(а)сти, но грешных призывати на покаяние». Въ еж(е) обратитис(я) и живым бытии имъ еи, Г(оспод)и, Ц(а)рю Н(е)б(е)сны, ослабли и остави [278] н(ы)не пр(е)ч(и)стая Ти Б(о)гом(а)т(е)ре Твоея, и с(вя)тых п(а)триярхъ5, и ц(а)реи преж(е) бл(а)гооугодивших Твоему Б(о)ж(е)ству во граде семъ».
Сия вся и6 намного изрекшим, також(е) и пренепорочнои Б(огоро)д(и)ци от среды с(е)рдца стенанием и рыданиемъ, по вся дни моля Х(ри)с(т)у. [л. 508 об.] Ц(а)рь же объежжаше в круг града почастоу, оукрепляя стратиги воином и всех людеи, да не отпадуть надежею, ни ослабляють сопротивлением на враги, но да оуповають на Г(оспод)а Вседержителя, тои бо есть помощник н(а)шь и защитител(ь) есть, и паки обращьшес(я) на м(о)л(и)тву.
Турки ж(е) на всех местех бияхуся д(е)нь и нощь, не дающе нимало опочинути градскимъ, и одася оутрудять, понеж(е) уготовляхуся к приступоу, и тако творяху обои тринадесять днеи. В четвертыи ж(е) на десять д(е)нь, откликнувше скверную м(о)л(и)тву, начаша в сурны играти, и в варганы и в накры бити, и, прикативше поушки и пищали многие, и начаша бити град, також(е) стреляти из ручных луков тмоч(и)сленных. Гражане ж(е) от бесчисленнаго стреляния не могоша стояти на стенах, но, западше, ждаху приступу; а инии против стреляху ис пушекъ и ис пищалеи, елико можаху, и многи турки оубиша.
Патриярхъ ж(е) Анастасие, и с(вя)т(ите)ли, и вес(ь) с(вя)щенническии чин бяху непрестанно молящеся о милости Б(о)жии и о избавлении града. Егда ж(е) безбожнии турки всех людеи и стен збиша, абие воскричавше все воинство и нападоша на град вкупе со всех стран, кричаще и вопиюще, ови со огни различными, а инии и с лествицами, друзии ж(е) стенобитными хитростьми и иными многи козни на взятие града.
Градские ж(е) люди також(е) вопияху и кричаху на них, биющеся с ними крепко. Ц(а)рь же [л. 509] об(ъ)ежаше по всему граду, поноужая люди своя, дающе им 4(-ю) надежю Б(о)жию; повеле звонити по всему граду на созваниемъ людем.
Тоурки ж(е), слышавше звон вели, поустиша, сырныи и трубныи глас и тимпань тмочисленных. И быс(ть) сеча зла и преужасная от поушечного бою, и от пищалнаго стуку, и от звуку звоннаго, и от гласов, и воплеи, и кричания от обоих людеи и от трестоты оружия; також(е) от плача и рыдания градцких людеи о жен и детеи7, яко земли поколебатис(я), и не бе слышати друг друга, что гл(аголе)ть. Быс(ть), яко гром велии, от множества огня стреляти поушек и пищалеи и обоих стран дымное курение згоустився, покры град и воиско все, яко не видети друг друга, с кем ся биеть, из зелеиного д(у)ху. Мнозие оумираху и сечахуся, имаяся за руки на всех странах, дондеже нощьная тма их раздели. Тоурки убо от(ъ)идоша во своя станы и м(е)ртвыя своя оставив, и градские люди падоша от труда, аки м(е)ртвыи, токмо стражеи единых оставиша по стенам.
Наоутрия ж(е) ц(а)рь повеле собрати трупия м(е)ртвых и погрести беж числомъ оубьеных славных и знаемых греков 1740, а врягов и армен 700. Ц(а)рь же з бояры поиде по стенамъ града, хотя видети ратных, и не бе от них гл(а)са ни послушания: вси бо бяху опочивающе от труда. И видеша полкы8 рвы трупия, а иные – в потоцех, и на брезе громады м(е)ртвых; и пометиша оубьенных турковъ [л. 509 об.]18 тысящь. И повеле ц(а)рь стенобитные сосуды их и хитрости вся огню предати, а самъ ц(а)рь поиде с патриярхомъ, и съ с(вяти)т(е)ли, и со всеми с(вя)щенными соборы во с(вя)тую великую ц(е)рк(о)вь,  молбы и бл(а)годарения воздаяти всесилному Б(о)гу и пр(е)ч(и)стеи Б(о)гом(а)т(е)ри, чаяху бо оуже отступити безбожному.
Онъ ж(е), безб(о)жьныи ц(а)рь Бахметь зверообразен, видев толикое падение своих храбрых, не тако помышляше, но во вторыи д(е)нь посла видети м(е)ртвыя своя, яко сказаша много м(е)ртвых; вскоре посла полки многие взяти м(е)ртвыя своя. Ц(а)рь ж(е) Костянтин заповеда, да не дають их никоею бранию, яко да оч(ис)тяс(я) ть первые9 потоцы, и тако взяша своя трупия безбранно и пожгоша. Видев же безб(о)жьныи Багметь, яко не оуспе ничтож(е), но пач(е) своих погуби; и повеле магистром въскоре10 прибавити поушки и пищали многие и стенобитные козни готовити. И въ 7(-и) же д(е)нь, пак(и) безб(о)жьныи повеле ити воиску ко граду, и такося бити, якож(е) первие без опочивания. Ц(а)рь ж(е) Костянтин послыша по морю и по суху во Амморию ко братьям своим, и в Венецею, и в Зиновею о помощи. И братия его не успеша, понеж(е) распря велия бе межю ими, и съ арба наши ратовахус(я), а вряговене восхотеша помощи, но гла(гола)ху: «Не идите, да возмуть его туркы, а у них мы возмем Ц(а)рьград». И тако не бысть ниоткуды помощи. [279]
Един токмо Зиновеянин кн(я)зь именемъ [л. 510] Зустунея приде ко ц(а)рю Костянтиноу на помощь на дву кораблях и на дву каторгах, имеа съ собою 600 храбрых; и проиде вскозе11 всея рати морския и турския, и доиде здрав до стены Ц(а)ряграда. Его ж(е) видев, ц(а)рь возрадовася зело, дающемоу ч(е)сть велию, понеж(е) ведом бяше ц(а)рю. Онъ ж(е) испроси у ц(а)ря хоужшее приступное место града, ему ц(а)рь людеи своих на исполнение дву тысяч; и бияшес(я) с туркы толма12 храбро и муж(е)ственно, яко отступити от того места всемъ туркомъ и к тому не приходити на то место.
Зоустунеан ж(е) стокмо свое место снабдеваше, но по инем местом града обхожаше оукрепляя и наставляя люди, да не отпадуть надежи, и на Б(ог)а оуповати неподвижно, и не ослабляти в делех от всея д(у)ша и от всего с(е)рдца братис(я) с неверными; и Г(оспод)ь Б(ог)ъ поможет ны. Таковыми словесы мъногими уча оубо его во всемъ. Тоурки ж(е), ко всемъ местомъ пристапающе13, стужаху гражаномъ без опочивания пременяющес(я), зане бе множ(е)ство их, якож(е) и предрекохом. И въ тре тридесятыи ж(е) д(е)нь по первому приступе прикатиша пушки, и пищали, и иные стенобитные сосуды мнози, в нихже пушки  бяху две велице. Их же ту солияше, едино ядро в колено, а другие в пояс, и со всеми силами приступив, и нача14 бити град [л. 510 об.] безпрестанно со всех стран. Противу Зоустунеша навадша пушку болшую, зане на томъ месте стена бе градцкая ветха и ниска, и яко удариша по тому месту, и стена поколебася, и паки в тое оудариша и збиша стены сверху, аки сажеи пять. В третье же не оуспеша, зане нощь приспе. Зустунея ж(е) то место нощию здела, и другою стеною древяною со землею изнутри подкрепи, но что мощно оучити противу такия силы, но и паче ж(е) противу гнева Б(о)жия грех ради наших.
Наоутрия ж(е), паки начаша бити то ж(е) место изо многих пушекъ и ис пищалеи, яко утрудиша стеноу, стрелиша из болшие пушки оуже чаяху разорити стеноу. Б(о)жиимъ заступлениемъ поиде ядро выше стены, токмо седмь зубовъ захвати, и оударися ядро по ц(е)рк(о)внои стене, и распадес(я) ядро, яко прах. И видеша ту сущии людие, бл(а)годариша Б(о)га, яко оуж(е) от полудни навадиша во другие. Зоустунея ж(е), нарядив пушку свою, удари в тую пушку и разседеся оу нее зеленник. Сия ж(е) видевъ, безверныи Магметь воз(ъ)ярися до зела, възопи великим гл(а)сомъ: «Агма, ягма». Сии реч(е) на разграбление града, абие воскрича, воинство все приступиша ко граду всеми силами по земле ж(е) и по морю, всякими делы и хитростьми на взятие града. Градцкие ж(е) людие вси взыдоша на стены и противляхуся имъ, биющеся  крепце. [л. 511]
Яко патриярху, и с(вя)т(ите)лем, с(вя)щеническимъ чиномъ токмо остатися по ц(е)рьквам Б(о)жиимъ и молитися Г(оспод)у Б(ог)у со слезами и рыданием. Ц(а)рь ж(е) непрестанно об(ъ)ежжаше по своему граду плач и рыдания, м(о)ля15 стратиг и всех людеи, гл(агол)я: «Г(о)с(по)де, братие16 мали и велицы. Дн(е)сь прииде час прославити Б(о)га и пр(е)ч(и)стую Ег(о) Богоматер(ь) и нашу православную веру хр(и)стиянскую. Мужаитес(я) и крепитес(я), не ослабляите во трудех, ни отпадаите надежею, кладуще гл(а)вы своя за православноую веру и за с(вя)тыя ц(е)ркви, яко да и нас помилуетъ прославит всещедрыи Г(оспод)ь Б(ог)ъ». И повеле звонити по всемоу граду.
Також(е) и Зустуния, рыща по стенамъ, оукрепляше и понужаше людии, якож(е) слышаше людие звонъ с(вя)тых ц(е)рквеи. И абие оукрепишас(я) и охрабришас(я) вси, бияхуся с туркы крепко, гл(аголю)ще друг другу: «Оумремъ за веру хр(и)стиянскую, якож(е) предписахом».
Киии17 языкъ можетъ исповедати или изрещи тоя беды и стр(а)сти? Падаху бо трупие обоих стран, яко снопы з забрал; и кров(ь) их течаше, яко рекы. И наполни рвы трупия ч(е)л(ове)ча доверху, яко чрез их ходити турком, аки по степенем; и битися м(е)ртвыя бо имъ мостъ и лествица ко граду, також(е) и потоци и бреги вкруг града наполнишася трупия, и Илименю Галатьскому кроваву быти: тако силно и нещадно сечахус(я). И аще не бы Г(оспод)ь прекратил д(е)нь тои, конечная бы уож(е) погибел(ь) граду, понеж(е) гражане вси уж(е) бяху изнемогоша. [л. 511 об.]
Нощи наставши, турки отступиша ко станом своим, аки оуставше, а градцкие люди падоша, кождо где оуспе, от труда. И бе тое нощи слышати, ничтож(е) ино развее стенание вопль сеченных людеи; и кои еще живы бяху, тех повеле раздати врачемъ. Наоутрия ж(е) ц(а)рь повеле с(вя)щеникомъ и дияконом [280] собрати и погрести трупия, а иж(е) еще живы бяху, тех повеле раздати врачем. И собраша м(е)ртвых греков, и фряг, и армен, и иных пришелцов 5000 и 700. Оустунея18 ж(е) и вси велможи поидоша по стенамъ града, сматряюще со стен трупия неверных. И тако пометившее, и сказаша ц(а)рю и патриярху: «30 000 и 5 тысяч оубиеных турков». Ц(а)рь ж(е) бе плача и рыдая, не престаяше видящи падение своих людеи, а помощи ниоткоуду чаяше и неотступно се дело неверных. Патриярхъ ж(е) и вес(ь) клирос, також(е) и вес(ь) синклить ц(а)рскии взяша ц(а)ря и поидоша, оутешающе его, к великои ц(е)ркви на м(о)л(и)тву и бл(а)годарение всем(и)л(о)ст(и)вому Б(ог)у. Також(е) и множ(е)ство бл(а)годарных жен и детеи съ ц(а)р(и)цею; и бяше видети во всемъ граде всемъ людемъ и женамъ, притичющимъ къ Б(о)жиимъ ц(е)рквамъ, со слезами хваляще и бл(а)годаряще Б(о)га и пр(е)ч(и)стую Б(о)гом(а)т(е)рь, и тако проводиша д(е)нь тои и всенощное  бдение.
Безбожны ж(е) трупия людеи своих не восхоте взяти, но помышлявше их метати порокы во град да згниють и оусмрадять град. Нецы ж(е) в них добре знающе, [л. 512] град сказоваху ему, величество града и пространество, яко не коснется их смрад, абие пришед со многою силою, взяша их и пожгоша. И по сих въ (девятый) д(е)нь скверныи Магметъ, паки повеле всему воинству приступити ко граду и бран(ь) творити по вся дни, а поушку оноу великую паки повеле всему воинству приступити ко граду и бран(ь) творити по вся дни, а поушку оноу великую паки повеле пределати того крепчае. И аже оуведав велможи и Зустунея, собрався с патриярхомъ вкупе, начаша оуведащати ц(а)ря, гл(аголю)ще: «Видимъ, г(оспод)и ц(а)рю, яко сеи безверныи не ослабляеть деломъ, но паче готовится на болше дело; и что сотворимъ, помощи ниоткуду чающе. Но подобаеть тобе, г(оспод)и ц(а)рю, изытти из града сего на подобное место. И сия  оуслышавше, людие твои и братия твоя к тобе придуть на помощь, но и арба н(а)ша оубоявся придумать к симъ ж(е). Егда како сеи безб(о)жьныи Багметь, оустрашився, отступить от града сиянинаа». Многа изрекоша и карабли и каторги и даяху емоу Зустунеевы.
Ц(а)рь же на долгъ час оумолча, испущая слезы, и тако реч(е) имъ: «Хвалю и бл(а)годарю совете ваш. И вемъ тако на ползу ми есть сия вся, понеж(е) могоуть сия тако быти. Тако сие аз сотворю и оставлю с(вя)щеньство, и ц(е)ркви Б(о)жия, и ц(а)рство, и всех людеи и в толице и беде сущеи, что ми изречеть вселенная. Молю вы, рцете ми Г(о)с(по)дне патриярхе мои, ни да оумру, с вами пад». Поклонися патриярху и прочим, плачася [л. 512 об.] горько. Патриярхъ ж(е) и вси ту сущии людие восплакащася, и прекратиша, реч(е): «Да не плач(ь): молва боудеть в людех». И послаша пакы въ Амморию, и вси ту островы, и въ вряги от помощи.
Гражане ж(е) в д(ен)ь бияхуся с туркы, а в нощи влазяху19 во рвы от поля и, изнуряя землю по застению во многих местех, заделвающе многие сосуды с пушечным20 зелиемъ; також(е) и на стенах оуготовляху многие сосуды, наполняюще смолия и серы горящие и поскон съ смолою и з зелиемъ пушечним, днем же минувшим (двадцать пятым); тако биющеся по вся дни. Паки безб(о)жьные повеле прикатити ону пушку велию, бе бо увязанна обручи железными, чаяху оукрепивше ю и копустиша21 ю въ первые, и абие разседеся на многие части. Он же безверныи, мняшес(я) поруган быти, и вскоре повеле тоуры прикатити ко граду всеми силами, бяху бо велицы покровенны. И егда оуставиша туры по всему брегоу, рвахотя наполнити рвы древесы и хврастием, и землю придвигнути, и приклонити туры ко граду. И паки поткопывати стеноу во многие места и низвергнути на землю, яко приступиша множ(е)ство людеи рвы засыпати; и абие гражане зажгоша сосуды зеленныя, иже бяху заделанныи вневра22 и внезапу возгреме земля, яко громъ велии. И под(ъ)яся с туры и с людми, яко буря силная до облак; и бе слышати трескотъ, и стрение тур, и вопль и стенание [л. 513] людского страшно, яко обоим бежати.
Гражане ж(е) оубо стен во град, а турки от града далече; и падаху с высоты людие и древес, ови во град, а инии – в ров. И наполнишася турков рвы, и якы взыдоша паки гражане на стену, и видеша во рве ж(е) множ(е)ство турков рвы, абие зажигаху бочки съ смолою и пущаху на них. Погореша вси, и тако Б(о)жьим промысломъ в тои д(е)нь избавис(я) град от безбожных турков.
Злонравыи ж(е) Магметъ со множ(е)ствомъ вои своих издалече бяше, смотря бывшаго, и помышляше, что сотворити; також(е) и ратные вси, оубоявшеся, отступиша от града. Греки ж(е), вышедше из града, побиваху кои еще живы бяху, и, собравше их во многие грады, сжигаху их со оставшими туркы. Ц(а)рь же с патриярхом и вес(ь) с(вя)щенныи събор по всемъ ц(е)рквам, молящеся и бл(а)годаряще Б(о)га, чаяху конецъ бранем. Також(е) и тои зловерныи Магметъ, многие дни советовав, приложи отступити от града восвоясы, занеж(е) ужь морскии приспе, чаяху отвсюду помощи градоу. [281]
Но оуб(о) понеже беззакония наша превзыдоша, гл(а)вы наша и грехи н(а)ша оттяготеша, с(е)рдца н(а)ша во еж(е) заповедеи Б(о)жьих не послушати, и в путех его не ходити, и гнева Ег(о) мы како оубежим, [ца]рь оубо во граде с патриярхом, також(е) и всему ц(а)рскому сунклиту и всемъ людемъ советъ советующимъ на бл(а)гое гл(аголю)ще сице: «Понеж(е) он зловерныи тако многие дни стоить, безпрестанно на нас паки готовится, [л. 513 об.] но да послем к нему от миру, еж(е) и сотвориша». Он же, лоукавыи, сия слышав, возрадовася во с(е)рдци своемъ, чающи: ноужа некая приде граду; и, отлагаше свое отступление, нача советовати от миру, тако отвеща посланником: «Аще просите миру, и яз сие сотворю. Да но изыдеть ц(а)рь из града во Амморию, також(е) и патриярхъ, и вси людие, иж(е) хотятъ без вреда оставльше мне град, пусть и яз мир вечныи сотворю, да не вступлюс(я) во Амморию и иж(е) в островы ег(о),  ни которою хитростью въ веки. А иж(е) не восходять изыти из града, да будуть во имени моемъ без вреда и без печали».
Сия вся слышав, ц(а)рь, и патриярхъ, и вси людие абие востенавши от среды с(е)рдца, и руце на н(е)бо воздевше, гл(аголя)ху: «Заступниче н(а)шь, Г(оспод)и, призри от высоты славы Твоея и изложи гордыню сквернаго сег(о), и избави град достояния Твоего, ибо люди есмы вл(а)д(ы)ч(е)ства Твоег(о), и овца пажити Твоея, живущь во дворе Твоемъ во единомъ стаде. И камо изыдемъ, оставившее стадо, пастыря и наставника своег(о) ни г(оспод)и ц(а)рю, ни но да оумрем зде во с(вя)томъ дворе Твоем и славу величествия Твоего». Сия вся ирекшимъ, пакы оуготовляхус(я) на бран(ь), кающеся от послании к безб(о)жьному Магмету, зане тем оудержаху его.
Днем же тремъ минувшим, сказаша окаянному тоурку, яко пушка она велия слияся добре. И тако совещеваше еще поиску ситию и повеле пакы воинству всему поити ко граду и бран(ь) творити по вся дни. [л. 514] Сие ж(е) бысть за грехи н(а)ша Б(о)жимъ попущением, яко да збудется вся преж(е)реченная о граде семъ при Констинтине Велицем, Лве Пр(е)м(у)дремъ и Мефодием, еп(и)с(ко)помъ Патръским, м(е)с(я)ца мая въ (шестой) д(ень). Паки безверныи повеле бити въ град, в то ж(е) место иде ж(е), первие бияхуть изо многих поушек и пищалеи по 3 дни, яко утрудиша стеноу и оудариша из болшие пушки, и спаде стены камения много. И во другие оудариша, и распадес(я) стены велие место, иж(е) у вечеру наставшу турки нача стреляти изо многих поушек в то ж(е) место безпрестани, всю нощь не дающе гражономъ, зделывати тог(о) места.
Наоутрия ж(е) паки оудариша тоурки из болшки23 пониж(е) того места, и вывалиша много стены, и тако въ другие и в трет(ь)ее, яко уж(е) оучиниша место велие; абие воскричавше множ(е)ство турков въскочиша на то место, друг друга понужающе, також(е) из града противу их слечахус(я) зле, рыкающе, аки дивии зверие24; и бе видети страшное обоих дерзости и крепости. Зоустунея ж(е) собра многие люди, воскричав, нападе на турки и моужествене, и абие погони их с стены и наполни род м(е)ртвых. Амуратъ ж(е), некии янычанин, крепок сы теломъ, смешався з грекы, дондо Зустунея и нача сещи его люте; гречин же некии, скочив стены, отсече турчину главу, ногу секирою, и токо избави Зустунея от см(е)рти.
Флабурра ж(е), воевода западныи, турчин [л. 514 об.] Армабеи съ своими полки нападе на греки, и быс(ть) сеча зла. Из града ж(е) Раккавевею25 стратигоу со многими людми приспевшу на помощь, и прогна турки даж(е) и до самого Армабея. Он же видев Раккавея люте секуща турков, и обнажив меч нападе на н(ь), и сечахуся оба зле. Раккавеи ж(е), наступив на камен(ь), оудари Амербея26 мечемъ по плечю обе руч(и), и разсече его на полы и силу бо имеяше в руках велию. Турки ж(е), тмочисленно окруживше его, сечаху люте; и разсекоша Ракъкевея на части, а греков погнаша во град. И быс(ть) греком плач и ужас велии о Раккавеи, понеж(е) ратник бе велии и мужествен и ц(а)рю любимъ.
Оуж(е) нощи наставши преста сеча и разыдошас(я) обои, и  тоурки оубо начаша стреляти ис пушекъ на разрушенное место, а граждане ж(е) начаша башту ширити и делати крепко о всеи прогалине, и наводиша в ню пушки многие таине, зане башта бе изнутри града.
Наоутрия ж(е), яко видеша турки стеноу незаделану, и воскоре наскочиша, бьяхус(я) з грекы. Грецы ж(е), биющес(я) с ними, побегаху от них, а туркы воскричаху на них. И вскоре нападоша множество их, чающее оуж(е) одолевше, згустившимся многимъ туркомъ. Грецы ж(е) разбегошася и пустиша на них пушки, и побиша много турков.
И из града нападе на них Палеолог, стратиг Синтурла, со многими людми из града, избивавше их крепко в точныи же Флабурра [л. 515] Мустофа воскоре приде на греки со многою силою и прогна их во град, оуж(е) [282] хотяху стену отняти. Феодор же, тысящник, совокупис(я) со Зустунеемъ, поскориша на помощь, и быс(ть) сеча велия, и турки одолева.
Ц(а)рь же бяше в притворъ великия ц(е)ркви со всеми бояры и с стратиги, советуя о оустремлении безб(о)жьнаго, гл(аголя)ше: «Се оуж(е) по вся дни секуще с турки, колико тысящь погибе нашег(о) люду! Аще впред(ь) тако ж(е) будеть, всех нас погоубять и град воспримуть. Но собравшес(я) со избранными и назнаменавшеся, изыдемъ из града нощию, в подобно время и Б(о)гу помогающу, нападемъ на них, яко иногда Гедеон на Мадия. М(о)ли или да помретъ за ц(е)ркви Б(о)жия или избавление получим». Тако оубо советующе, мнози на то оуклоняхуся, надеяху, бо с(я) на, зане ведаху храброс(ть) и силоу его, великъ бо бе зело исполнен силою Кир. Лука же архидуксъ и Николаи епархъ молчаша на долгъ час и тако рекоша: «Се оуж(е) (пятый) м(е)с(я)ць прошло, отнеле же начахомъ братис(я) с туркы, просяще м(и)л(о)сти Б(о)жия. И аще будеть воля Ег(о), еще можем иные 5(-ти) м(е)с(я)ць братися с ними. Аще ли не будеть Б(о)жия помощи, и тако сотворим, единым часомъ вси погибнемъ и град погоубим». Елики жо доместникъ, и с нимъ Логофетъ, и иные мнози велможи совещаху: да изыдеть ц(а)рь из града на подобное место, взем съ собою избранных, колико мощьно на отсеку града, да не дающе туркомъ [л. 515 об.] толико дерзостне приступати ко граду, и издалеча потребная провадити; и оуслышав сия хр(и)стияне, соберутся к немоу многие люди, и тако умышляющимъ им. Сказаша ц(а)рю, яко оуж(е) турки взыдоша на стеноу и одолеваютъ гражан, 100 же напрасно погнавшу, и всемъ велможам и стратигомъ. И миноувше ц(а)ря, велможи и стратиги поскориша на помощь, и сретоша на род мног бегающь, и возвращаху их биюще. Зустунея же со инеми стратиги бияхус(я) с турки оуж(е) во граде, овогда оукрепляющеся, овогда бегающее пред туркы, возвращахуся и боряхуся с ними, а инии с турки мнози мостъ сотвориша, на конех воежжаху. Стратигом же всемъ, снемшимся со Зустунием, нападаху на туркы сурово27, и возвратиша их до стены, но оубо турком многимъ вшедшимъ во град конникомъ и пешьцом, возвратиша стратиги, пакы и бияхуся нещадно и одолеваху греков. И аще не бы оускорил ц(а)рь к нимъ, конечная бы оуже погибел(ь) граду.
Постигшю ж(е) ц(а)рю и нападшю на турки со избранными своими, и сечаше их нещадно и оужасно; ихже бо достигаше, разсекоша надвое, а иных пресекая наполы, не оудержаше бо с(я) меч его ни в чемъ. Турки ж(е) скликивахус(я) противу крепости ег(о), и друг друга понужаше нань, и всякимъ оружиемъ суляху его, и стрелы безчисленные пущаху нань, но оуб(о), якож(е) речес(я) бранные победы, ц(а)рьское падение Б(о)жиимъ промыслом бываетъ: оружие бо их и вся стрелы [л. 516] суетно падаху и, мимо его летающе, не улучахутъ ег(о).
Ц(а)рь же, един меч имея в руце, сечаще их; и бежаху от него из града к разрушенному месту, и ту затеснившимся, побиша турков многих, а иных прогнаша за рвы. И тако Б(о)жиею помощию в тои д(е)нь ц(а)рь избави града, и оуж(е) вечеру бывшу, турки28 отступиша. Наоутрия же епархъ Николаи повеле гражаномъ избиенных турков метати из града за рвы на показание безб(о)жьным, и быс(ть) числом 16 тысящь; и взяша их турки и пожгоша. Епарху ж(е), пакы повелевшу разрушенное место все заставити древомъ и башту делати, чающе оуж(е) отступити окаянному.
Безбожныи ж(е) Магметъ не тако совеща, но по три дни собрав паши свои и санчакбеевъ, тако реч(е) имъ: «Видимъ оубо, яко Агаоурове ограбишас(я) на нас, и тако бранящес(я) с ними, не можемъ их одолети, понеж(е) о едином месте токмо бранихомся о разрушенномъ многими людми невместно, а малыми людми; и они премогаютъ нас и тако одолеваютъ нас, но да сотворим пакы ягму, якож(е) перьвее придвигнувше туры и лествицы ко стенамъ града на многие места и разделившимся гражаномъ по всем местом на супротивление, и приступимъ крепко к разрушенному месту». И еж(е) совеща окаянныи Б(о)жим попущением тако, и сотвори туры убо и лествицы и иные многие козни приступные повеле оуготовляти, а воиномъ [л. 516 об.] повеле пакы братис(я) со гражаны по вся дни, не дающе гражаном опочивания.
Знамение о пламени, изшедшимъ из ц(е)ркви.
Въ (двадцать первый) д(ень) м(е)с(я)ца маиа быс(ть) знамение страшно29 во граде: нощи оубо противу пятка ос(вя)тися град вес(ь), и видеша стражие течаху видети бывшее чаяху, оубо турки зажгоша град. И воскликаше велиемъ гл(а)сом, и собрашас(я) людие мнози видеша оу великия ц(е)ркви пр(е)м(у)дрости Б(о)жия оу верха из окон пламени великоу изшедшу и, окруживше всю шею ц(е)рк(о)вную на долгъ часъ, и събрався пламен(ь), воедино пременися, и быс(ть), яко светъ неизреченныи, и абие взятся на н(е)бо. О нем [283] же зрящимъ начаша плакати, горко вопиюще: «Г(оспод)и, помилоуи». Свету ж(е) оному, достигнувшу до н(е)б(е)съ, и отверзошася двери н(е)б(е)сныя, и приятъ светъ, паки затворишас(я).

 

Наутрия ж(е) шедше, сказаша патриярху. Патриярхъ ж(е) Анастасеи, собрав бояре советников всех, поиде ко ц(а)рю и начаша увещевати его, да изыдетъ из града съ ц(а)р(и)цею. Яко не послуша их ц(а)рь, реч(е) ему триярхъ30: «Веси, о ц(а)рю, вся преж(е)реченная о граде семъ: и се н(ы)не, паки ино знамение се страшно быс(ть). Светъ оубо он неизреченныи, иже бе съдействуя в велицеи ц(е)рькви Б(о)жия пр(е)м(у)дрости с прежними светильники, и архиереи вселенскими, и ц(а)ри бл(а)гочестивыми, також(е) и анг(е)лъ Б(о)жии, егож(е) укрепи Б(о)гъ при Оустияне ц(а)ри на31
[л. 517] сохранение с(вя)тыя и великия ц(е)ркви, и граду сему в сию бо нощь от(ъ)идоша на н(е)бо. Сие знаменоуеть, яко м(и)л(о)сть Божия и щедроты Ег(о) от(ъ)идаша от нас, и хощетъ Г(оспод)ь Б(ог)ъ предати град сеи врагомъ нашим грехъ32 ради наших, и тако предпостави Емоу грех ради наших онех моужеи, иж(е) видеша чюдо».
Яко оуслыша ц(а)рь гл(агол)ы их, паде на землю, яко м(е)ртвъ, и быс(ть) безгласен на мног час. Егда отлияша ег(о) араматными водами, воставшу же ему. Патриярхъ ж(е) пакы начать крепко оувещати ц(а)ря, да изыдетъ из града, також(е) и бояре вси гл(аголя)ще ему: «Тобе, г(оспод)и ц(а)рю, изшедшу из града, елицыми восхощеши, паки Б(о)гу помогающу. Мощно ти ес(ть) граду помощи, и иные грады, и вся земля надежю имеюще, тако вскоре не предадутся неверным». Онъ ж(е) не оуклонис(я) на то, но отвещеваше имъ: «Аще Г(оспод)ь Б(о)гъ нашь изволи тако, како мы избегнем гнева Его? И колико ц(а)реи и преж(е) мене бывших великих и славных, иж(е) пострадаша и за свое от(е)чество помроша, и аз ли последнии сег(о) не сотворю, но да оумру зде с вами». И не послуша их.
Во вторыи ж(е) д(е)нь, егда оуслышаша людие отшествие С(вя)т(о)го Д(у)ха, абие растаяшас(я) вси людие, и нападе на них страх и трепетъ, а патриарх33 же оукрепля их и оучаше не отступати надежею, но дерзаите оубо чада дерзаите, гл(аголя)ше: «И на Г(оспод)а Б(ог)а н(а)шего сп(а)сение наше возложим, и к Нему руце, и нозе, и очи от всея д(у)ша возведемъ; и тои нас избавитъ [л. 517 об.] от врагов наших. И вся сущая на нас вражия совещания ражденетъ сицевыми иными многими, бяша оукрепляя народы». И тако с(вяти)т(е)ли со всеми с(вя)щенными соборы взем шестая иконы, обхожах по стенам града, просяща по вся дни Б(о)жия м(и)л(о)сти со слезами гл(аголю)ще:
Моление.
«Г(оспод)и Б(о)же нашь, безсм(е)ртныи и безначальныи здетелю твари34 всея видимыя и невидимыя, иж(е) нас ради небл(а)годарных и злонравных сшед с н(е)б(е)се, воплотис(я), и кров(ь) Свою за ны пролия. Призри оубо и н(ы)не, Вл(а)д(ы)ко, от с(вя)т(о)го жилища Твоег(о) на смиренныя рабы Своя, и прими грешное наше моление, приклони оухо Твое, и оуслыши гл(агол)ы наша конечне. Погибающим согрешихом бо Г(оспод)и, согрешихом на н(е)бо и пред Тобою мерскими делы, студными всячески, себе не потребныи, сътворше н(е)бу и земли и тоя самоя временныя жизни, и недостоини возрети на высоту славы Твоея, озлобихомъ Твою бл(а)годать, и разгневахом бо Твое Б(о)ж(е)ство, и преступающе Твоих заповедеи, не послушающе Твоих повелении. И оубо Вл(а)д(ы)ко и Ц(а)рю ч(е)л(ове)колюбив и незлоблив, сыи долготерпелив и мног(о)м(и)л(о)стив, пр(о)роком своимъ реклъ еси: “Яко хотениемъ не хощоу см(е)рти грешникоу, но еж(е) обратитис(я), и живу бытии ему”. И паки не приидох праведных призвати, но грешных на покояние не хощеши бо, Вл(а)д(ы)ко, создание Твоих рукъ погубити. И иж(е) бл(а)говолиши о погибели ч(е)л(ове)ч(е)стеи, не хощеши всем [л. 518] сп(а)стися и в разум истинныи приити; тем же и мы, недостоинии создание творение Твоег(о) Б(о)ж(е)ства бывше, не отчаемся Твоег(о) сп(а)с(е)ния на Твое ж(е) бесчисленное бл(а)гаоутробие надеемся, припадаем и вследуемъ всем нашим с(е)рдцемъ и ищемъ м(и)л(о)сть Твою. Пощади, Г(оспод)и, пощади, ихже и купил еси животворною кровию Твоею. Не предаи ж(е) нас врагомъ и суперникомъ вл(а)д(ы)ч(е)ствия Твоег(о) и избави нас обистояния днешняго и обышедших ны зол и напастеи. И сподоби по множеству м(и)л(о)сти Твоея, и изми нас по чюдесемъ Твоим, и даж(дь) славу имени Твоему35. Да посрамятся врази Твои, да постыдятся, от всякия силы крепость их да сокрушится, и да разумеютъ, яко Ты еси Б(о)гъ нашъ И(ису)с Х(ристо)с въ славу Б(ог)у Отц(у)».
Конецъ молению. [284]
Таковыми оубо иными многими молебными гл(а)вы по вся дни молящес(я), чаяху сп(а)сения своег(о). Також(е) вси людие бяху притекающе ко с(вя)тымъ Б(о)жьимъ ц(е)рквам, плачюще и рыдающе, и руце на н(е)бо воздеюще, просяще у Б(о)га м(и)л(о)сти. Но убо, елико прежде бл(а)годатеи даров Б(о)жьих и пр(е)ч(и)стые Б(о)гом(а)т(е)ри бл(а)годеянии сподоблени быхом, толико н(ы)не грех ради наших помилования и щедротъ Б(о)жьих лишении быхомъ, егда бо реч(е): «Прострете руки ваша ко Мне, обращу очи Мои от вас. И аще придете явити Ми ся, отвращу лице Свое от вас. И паки елико сотвориши, елико делаеши, ненавидитъ д(у)ша Моя». Таковым оубо ответомъ [л. 518 об.] и мы н(ы)не грех ради наших оуподобихомся, и мольбы и моления наша неприятна суть.
Тоурки ж(е), яко преж(е) рекохом, по вся днии бран(ь) творяще грекомъ, не почивах. А окаянныи же Магметь собра вои своих, раздели имъ места къ приступу: оубо Карачебея, противу ц(а)рских полат и древяных вратъ и Калихея, а Бегиларбею восточному – противу Пигни36 златаго места, а западному – против Корсуни всея. Сам же безверныи нарек себе посреде их, противу вратъ с(вя)т(о)го Романа и разрушеннаго места. Столу ж(е) морскому, Балтаоуглию и Заоугану – обе стены от моря. Яко да окружить вес(ь) град, во едино время и во един час ударити бранию на град по земли и по морю, и тако ударив неверныи въ 25(-ти) д(е)нь м(е)с(я)ца маа.
Проповедникомъ их, откникнувшим скверную свою м(о)л(и)тву, абие воскричавше, все воинство скакаху ко граду и прикативше пушки, и пищали, и туры, и лествицы, и грады древяныя, и иные козни стенобитные; також(е) и по морю придвигнувше катарги многие и корабли. И начаша бити град отвсюду, и мосты начаша чинити ко граду на вревехъ. Яко уж(е) збиша с стен всех гражан, вскоре придвигнуша грады древяные, и туры высокие, и лествицы тмочисленныя, нуждахуся силою взыти на стену, и не даяху имъ греки, но сечахуся с ними крепко.
Магметъ ж(е) окаянныи [л. 519] со всеми чины своими, заиграв во вси игры и в тимпаны, вопльми великими возшюмеша, аки буря силная, и приде на полое место, такимъ суровствомъ мняше внезапу похватити град. Стратигомъ ж(е) многимъ со Зустунеемъ приспевшим бияхуся с турки крепко, и быс(ть) пагуба велия гражаномъ, но убьеше час оу суда не приспевшу премогахус(я) с ними, яко страшно и жестоко бе видети обоих дерзости и мужества.
Патриярхъ же со всеми соборы бяше во с(вя)теи и велицеи ц(е)ркви, неотступне моля Б(о)га и пр(е)ч(и)стую Б(о)гом(а)т(е)рь о поможении и оукреплении на враги, плач(а) и рыдая, гл(аголю)ща: «Въскр(е)сни, Б(о)же, помози нам, конечне погибающим, не отрини людеи своих до конца, не даи ж(е) достояния Твоег(о) в поношение сыроятцем сим, да не рекутъ: “Г(о)с(по)де ес(ть) Б(ог)ъ их”, но да познають, яко Ты еси Б(о)гъ н(а)шь, Г(оспод)и И(ису)с Х(ристо)с во славу Б(ог)у Отцу». Сице и къ пр(е)ч(ис)теи Б(о)гом(а)т(е)ри возглашающе: «О всес(вя)тая Вл(а)д(ы)ч(и)це, стани, воздежи руце къ С(ы)ну Своему, Б(ог)у н(а)шемоу; утиши, Вл(а)д(ы)ч(и)це, еж(е) на нас гневъ Б(о)жии и пагубу оуж(е) бо, преч(и)стая Г(о)с(по)же, при оустех адовых ес(ть) мя поскори, о всем(и)л(о)стивая и ч(е)л(ове)колюбивая м(а)ти, ни изми нас, преж(е) даж(дь) не пожреть нас ад, яко даи вемъ прославится всес(вя)тое имя Твое, сице вопиюще и молящес(я) не престаху».
Ц(а)рю ж(е) приспевшу со избранными своими к полому месту, видев бран(ь) тяжчаишу, ста и самъ ту, и вси велможи; яко сказаша [л. 519 об.] ему безб(о)жьнаго оустремления, абие возопи воином, плачюще о братия и друзи: «Н(ы)не приде время обрести славу вечную за ц(е)ркви Б(о)жия, за православну веру, и сотворити что муж(е)ствено на память последнимъ». И оударив фарис, хотяше прескочити разрушенное место и доступити Магмета на отмщении крови хрестиянския, и яша его велможи, и оружникы, и пешцы нужею, зане невместно бе37 дело, и Магметоу безбожному в силе ж(е) тяжце соущи. Ц(а)рь ж(е), обнажив мечь, обратис(я) на тоурки, и якож(е) кого достизаше, мечемъ по раму или по ребром пресекающих наполы. И турки ж(е), оужасшес(я) крепости ц(а)р(е)вы, бежаху из града. Стратиги ж(е), и воини, и вси людие, видевше своег(о) ц(а)ря и храброс(ть) и мужество, и вси скакаху на туркы и пробиша их за рвы.
Магмет ж(е)  ста крепко и повеле, турков бья, возвращати на грекы; и быс(ть) сеча велика и примрачна, зане стрелы их помрачиша светъ. Греки ж(е) со обеихъ стран стены метаху на турки смолы горящие, и смолия пучны великия зажигающе. И оуж(е) с(о)лнцу зашедшу, сеча же непрестано огни безчисленныя [285] безбожныи сотворяше, и самъ скакаше по всемъ местом, крича и вопия, понужая своих, и чаяше оуж(е) пожрети град. Но убо греки и прочии люди на стенахъ сущи огражшес(я), дръзостию вопияху друг ко другоу: «Поскорим, братие, на суженное место, и помремъ за с(вя)тыя ц(е)ркви». И тако сечахус(я) с туркы крепко [л. 520] и до полунощи, и согнаша их, забрал и со градов их на землю, и преста  сеча, а от града не отступиша самъ окоянны стоя, брегоущи своих градов и иных кознеи, не надеюще гражаномъ зажещи.
Въ 27(-и) д(е)нь маиа паки безверныи повеле бити град подле разрушеннаго места изо многих пушок и пищалеи. На девятои године дни, наводив пушку болшую, удариша в башту, тако въ другие и в трет(ь)е; и разбиша башту, и тако приде тои д(е)нь. Нощи ж(е) наставши, Зустунея пакы со всею др[у]жиною38 и фряги вси начаша башту созидати, и прилетев ис пушки ядро каменное, и оудари Зустунея по персем, и паде на землю. И едва его отлияша и отнесоша во двор, бояре ж(е), и вси людие, и фрягове, иж(е) беша с нимъ, растаяху и не ведаху, что сотворити. Се ж(е) быс(ть) изволением Б(о)жиим на погибел(ь) граду. Понеж(е) полое место, оно тои хранящее великою силою и муж(е)ством, храбръ бо бе зело и м(у)дръ. Егда ж(е) сказаша ц(а)рю, и абие зело опечалис(я) ц(а)рь, и скоро поиде к нему со всеми велможами и со вращи, оутешающе ег(о). Врачеве ж(е) чре всю нощь оноу тружахуся о поможение его, и егда исправиша ему груд(ь) в шибеное место от удара, и абие отдохнув от болезни, и даша ему мало  брашна и пития, и почи тоя нощи мало. Оставше ж(е) дружине его оу башты с(о)зидати, и не оуспе ничтож(е). Зустунея ж(е) паки повеле нести собе тамо, и нача делати башту со усердием великимъ.
Въ (двадцать восьмой) д(ень) мая видеша туркы башту делающих. [л. 520 об.] Вскоре наскочиша множ(е)ство на полое место, також(е) и греки противу, и быс(ть) бран(ь) велия. Флабур же некии со многими срацыны ярости нападе на греки, в них же бяхуть муж страшен взоромъ и возрастом, и бияху грек нещадно, також(е) из града поскориша39 протостатор и с(ы)нъ40 его Андреи со многими людми на туркы, и быс(ть) сеча оужасна. Видеша ж(е) с стены 3 брата пятих онех мужеи и срачин, бьюща силне гражан, соскочиша сь стены, нападоша на них, и сечахус(я) с ними люте, яко дивитис(я) туркомъ и не деяти их чающим убиеным быти от срацын. И оубиша гражане два срацынина и тако воскрикав: «Туркы!». Нападоша на них множ(е)ство турков, они ж(е) оу них оуидоша во град вси трие без вреда.
О поломъ ж(е) месте сеча непрестанно пач(е) растяще, турки бо великою силою одолеваху гражан, стратиги ж(е) и велможи вкупе со Зустунеемъ муж(е)ствоваху крепко и падоша множ(е)ство со обеих стран. Но еж(е) Б(ог)ъ изволи тому41 преити, и прилетевшу Склопу оудари Зустинея, и изрази ему десное плече, и паде на землю, аки м(е)ртвъ, и падоша над нимъ бояре его и вси людие, кричаще и рыдающе, и понесоша его проч(ь), також(е) и фрягове вси падоша за нимъ.
Турки ж(е) слышавше рыдание смятение люцкое, абие воскричавше напустиша всеми полкы и потопташа гражан. И вогнавше во град их, биюще и секуще, видевше ж(е) стратиги и гражане оустремление турков, и начаша бежати. Погибел(ь) граду конечная уж(е) [л. 521] бы, аще не бы ц(а)рь ускорил со избранными своими. Ц(а)рю ж(е) приспевшу срете Зустоунея еще жива суща, и восплакас(я) о немъ горко, и по сем нападе на туркы со избранными своими, и бияше их нещадно, токмо бе един меч имея в руце, и их же достизаше, мечемъ разсекаше их надвое, аще и по коню оударить, падаху под ним и не оудержаше бо с(я) меч его ни в чемъ: в доспесе ни в конскои силе.
Ту тоурки ж(е) видеша крепость и муж(е)ство ц(а)р(е)во, бежаша от него. И тако прогнаша турков к полому месту и згустившимся ту множ(е)ство народа, и побиша их гражане, безчисленно заколаху бо их, аки свинеи, дондеж(е) проидоша полое место, а иж(е) бежаша на страны по улицам, те тамо поб(ь)ени быша. Турки ж(е) от(ъ)идоша от града, а гражяня падоша опочивати и не беяше тоя нощи и ничегож(е).
Ц(а)рь же с патриярхом и вси воинии поидоша в велику ц(е)рк(о)вь и возблагодариша Г(оспод)а Б(ог)а и пр(е)ч(и)стую Его М(а)т(е)рь, и похваляху ц(а)ря. Нецы ж(е) и сказаша, яко и самъ ц(а)рь во с(е)рдци своемъ превознесеся, но и отшествия поганных чаяху, не ведаху бо Б(о)жия изволения. Магметъ ж(е) видев толико падение своих и слышав ц(а)р(е)ву храбрость, тоя нощи не спа, но советъ велии и сотвори, хотящее б(о) тоя нощи отступити, занеж(е) уж(е) и морскии путь приспе, и корабли многие придуть на помощь граду. Да збудется Б(о)жие изволение: советъ тои не совершися! [286]
Знамение о тме нашедши на град42. [л. 521 об.]

Въ 7(-й) час нощи начать наступати над градом тма велия воздуху, оубо на аре огоустившуся, написас(я) над градомъ плачевным образомъ, и испушаше, аки слезы, капли велицы подобны величеством и взором бо воловому оку чрьвленным43, и терпяху на земли на долгъ час, яко оудивитис(я) всемъ людем в тузе велице и во оужасе быти. Патриярхъ ж(е) Анастаси въскоре собра вес(ь) клирикъ и сигклиъ44, и поиде ко ц(а)рю, и рече ему: «Светлеиши ц(а)рю, вся преж(е)реченная о граде сем добре веси, також(е) и отшествие С(вя)т(о)го Д(у)ха виде. И се паки н(ы)не твар(ь) проповедуеть пог(и)бель града сего. Молимъ тя, изыди из града сег(о), да не вси вкупе умрем, Б(о)га ради изыди»,то поведаше ему много деянии прежних ц(а)реи сим подобна. И не послуша их ц(а)рь, но отвеща имъ ц(а)рь: «Воля Господня да будеть».
Магмет же окаянныи, яко виде тму велию над градом, и созва книжникъ своих и молнъ, и воспроси их: «Что ес(ть) сия тма над градомъ?». И рекоша ему: «Знамение сие великое есть и граду пагуба». Он же безб(о)жьныи повеле вскоре уготовляти вся воя. Въ 29(-и) [день] маа пусти напреди тмочисленныя оружники, и пешца, и пушки, и пищали, и за ними все войско. И прикатив против полого места, поскориша пешцы оч(и)стити путь ратным и рвы изровнати, и тако напустиша туркы всеми [л. 522] полки и потопташа гражан. Стратигом же и мегистаном грекомъ, и всемъ конникомъ приспевшим подкрепиша народ и боряхуся с туркы. И по сем ц(а)рю приспевшу со седми велможами и со избранными своими, и нападе на туркы оуж(е) многу сушу45 воиска внутри граду, и смешався с ни, сечахуся тяшкимъ и зверообразным рвениемъ, и прогнаша турков к полому месту. Бегиларбеи ж(е) восточныи велик бе теломъ и мужествен, и оускорив со всею силою восточною, и воскричав, нападе на греки и размеси полки их, и прогна, и взем копие, напусти на ц(а)ря. Ц(а)рь ж(е), подав щит ему и отведе копие его, и оудари его мечем во главу, и разсече надвое до седла; и абие возопиша туркы многими гласы, и вземъ же его, отнесоша. Ц(а)рь ж(е), пригласив своих со восклицаниемъ многимъ, внидоша в полки их и, биа их, прогнаша из града; но аще б(о) горами подвизали, Б(о)жия изволения не премочи, аще бо речене: «Г(о)с(по)дь сохранить град всуе бдя и стреги прочая».
Туркомъ оубо множ(е)ством многимъ суще пременяхуся на бран(ь). Гражаномъ ж(е) всегда единымъ от многого труда изнемогаху и падаху. Магмет же окоянныи, слышав восточнага Бегиларбея46 оубииство, плакаше о немъ мног(о), озлобо любляше его храбрости его ради и разума, и въ яри вся поиде самъ своими враты со всеми силами на ц(а)ря. Повеле [л. 522 об.] навадити на поушки и пищали, бояше бо ся ег(о), яко да не изыдеть из града со всеми людми и нападеть на них. И пришед безб(о)жьныи, ста напротивъ полого места и повеле первие бити ис поушек и ис пищалеи, да отступят от града гражане. По сих напусти Балтаоулия пашу со многими полки, а на ц(а)ря посла три тысящи избранных и заповедаи, да оулучат ц(а)ря, аще и до смерти постражютъ или да ис пишали да убьютъ ег(о). [С]тратиги47 ж(е), и мегистаны, и вси велможи, видевше оустремление безвернаг(о) пришедшаго, вси тяжце отведоша ц(а)ря, да не всуе оумретъ. Он же, плача горко, реч(е) имъ: «Помните слово, еже рех вамъ, и обетъ положих: да оумру зде с вами. Не деите мене». Они ж(е) отвещеваху: «Мы вси умрем за ц(е)ркви Б(о)жьиа и за тя, г(оспод)и». И вземъ, отведоша его от народа и мног(о) оувещеваху его, да изыдетъ из града, и давше ему последнее целование, стоня и рыдая, возвратишася вси на уреч(е)нное место.
Балтаоулу ж(е) приспевшу со многими силами, сретоша его стратиги на поломъ месте, но не возмогоша удержати его. И вниде во град со всеми полкы, и нападе на гражан, и быс(ть) сеча крепчаиши всех прежних; и падоша стратиги, и мегистаны, и вси велможи, яко от многих48 мало от(ъ)идоша извещание ц(а)рю. Избьенных же гражан и турков не бе числа, три тысящники ж(е) растаху и совахуся по граду на все страны ищуще Собелову ц(а)ря.
Магметъ ж(е) окаянныи, паки вскоре [л. 523] оурядив, разслыша всю свою рать по всемъ оулицамъ и по вратомъ ц(а)ря беречи, а самъ ся оста токмо со анычаны, обрывся в обозе и пушки и пищали, уставив бояшес(я) бо ц(а)ря. Ц(а)рь же слыша Б(о)жие изволение и поиде в великую ц(е)рк(о)вь, паде на землю, прося м(и)л(о)сти Б(о)жия и прощения согрешениемъ, и покаявся, и простис(я) с патриярхом, и со всеми клирики ти49, и съ ц(а)р(и)цею, и поклонис(я) на вси страны до земля. И причастис(я) от патриярхъ с(вя)тых и стршных Х(ри)с(то)вых Таин, и поиде из ц(е)ркви; и абие возопиша вес(ь) клирик, и вес(ь) народ, сущии [287] ту, и жены, и дети, имже не бе числа, рыданием и стонанием, яко мнетис(я) ц(е)ркви оно и велико и колебатис(я); и гласи их до н(е)б(е)съ достизаху. Идущу ж(е) ц(а)рю из ц(е)ркви, си едино изрек: «Иж(е) кто хощетъ пострадати за Б(о)жия ц(е)ркви и за православноую хрестиянскую веру, да поидеть со мною». И вслед на фарисъ, поиде ко златымъ вратомъ, чаяше бо стрелити безб(о)жьнаго. Всего ж(е) воинства собрас(я) с ним 4000, и обрете оу вратъ множ(е)ство турков, стрегущих его; и побиваше их многих, поиде вод врата, но не можаще проити от многаго трупия, и паки сретоша его множ(е)ство турков, и сечахуся с ними до нощи.
О оубьени бл(а)говерного ц(а)ря Костянти.
И тако пострада бл(а)говерныи царь Костянтин Иванович за Б(о)жия ц(е)ркви и за православную хрестиянскую веру м(е)с(я)ца маиа въ (двадцать девятый) д(е)нь во вторникъ в лет(о) 6961. [л. 523 об.] Ц(а)рьствова 11 си оубо ц(а)рь Костянтин, последнии ц(а)рь православныи во Ц(а)реграде50. А по немъ насташа неч(е)стивии ц(а)ри и до сих времен. И храбрьствова оубо муж(е)стве н(ы)не51 бл(а)говерныи ц(а)рь Костянтин над турки, и оубив убо на конечном съступе своею рукою, якож(е) оставше и сказаша: «Безб(о)жьных турков болши штисот». А на предних боех безбожных турков от руки его падоша, имже нес(ть) числа. Понеж(е) оубо сии ц(а)рь Костянтин бл(а)говерныи оуподобися храбростию, и муж(е)ством, и силою древнему Самсону Маноеву, иж(е) оубившему ослею челюстию 1000 иноплеменник, с и быс(ть) в те поры 12 летъ.
Но на предняя возвратимся избыстьреное о семъ Ц(а)реграде, якож(е) в  прежних летописателеи речеся. Костянтином ц(а)ремъ град создася, и паки Костянтиномъ ц(а)ремъ скончас(я). Да не согрешением осужениемъ судомъ Б(о)жиимъ временемъ бываютъ злодеяние, обрече безаконие, превратить пр(е)ст(о)лъ сильных. О велика сила греховнаго жала, о колико зла творить преступление! О горе тебе, Седмохолмыи, яко поганнии тобою обл(а)годають52, ибо колико бл(а)годатеи Б(о)жьих на тобе возсияша, овогда прославляя и величая паче иных градов, овогда мног(о)образне и многократне наказуя и наставляя бл(а)гыми делы и чюдесы преславными, овогда ж(е) на враги победими прославляя не преста! Аще бо пооучая, ко сп(а)с(е)нию призывая и житиискими зде обилии оутешая и оукрепляя всячески. [л. 524] Також(е) и пренепорочная М(а)ти Х(рист)а, Б(ог)а нашег(о), неизреченными бл(а)годеяннии53 миловаше, храняше во вся времена. Ты ж(е), яко неистовен, юж(е)  на теб(е) м(и)л(о)сть Б(о)жию и щедроть отвращашес(я). И се н(ы)не открыс(я) гнев Б(о)жии на тебе и предаде тебе в руце врагомъ твоим. И кто о семъ не восплачется или не возрыдаетъ, но убо пакы да преидем ко предлежащему.
Отошествие ц(а)р(и)ци.
Ц(а)р(и)ца ж(е) в он же час приять прощение от ц(а)ря, иночество приять оставше, иж(е) стратиги и бояре вземши ц(а)р(и)цу, и бл(а)городных д(е)в(и)цъ, и младых жен многихъ отстустиша54 в Зустунеевых кораблех и которгах во островы и во Амморию ко племеномъ. Народу же по улицамъ и по дворомъ не покаряющимся турком, но бияхуся с ними и падоша от них того дни и много людеи, и жен, и детеи, а иных полоняху. Також(е) и в стрелницах суще воини не предавахус(я)55, но бияхус(я) и з двоими туркы вне града сущемъ и внутри града. И в ден(ь) одолеваеми, бежаху и скрывахуся в пропастех, а в нощи вылазяху и побиваху тоурков. А иние людие метаху на них сверху полать керемиды, и плиты, и кровли полатные древяные зажигающе и со огни метаху на них, и иныя многия пакости деяху им. Оужасахуся паши Сеньзякобеи же посла ко ц(а)рю салтаноу: аще не сам внидеши во град, не одолен будеть град. Нъ ж(е) взыскание велие сотвори ц(а)ри, [л. 524 об.] и о ц(а)р(и)ци бояся во град внити, и быс(ть) в размышлении великомъ. И позва бояр, греков, и стратиг ц(а)р(е)вых, ихже поимаша на боех, ихжо паши взяша на свои руки.
Салтан же даде имъ свое крепкое слово и дары посла их с паши. И Санчакбеи рещи гражаномъ по всемъ оулицам сущимъ воином в стрелницах слово Салтаново с клятвою: «Да престанетъ бран(ь) без всяког(о) страху и убииства, аще лижнии то всех вас, и жены, и дети ваша огнь да помеч поясть». И сему бывшу преста бран(ь), и вдашася вси бояромъ, и стратигом, и пашамъ на рукы. И сия слышав, Салтан возрадовас(я) и посла во град ч(и)стити оулицы и площади.
Въ 11(-и) день по брани посла Санчакбеев по всемъ оулицам со многими людми бранити ирады, а самъ поиде безб(о)жныи со всеми чины в ратъ своих и во врата с(вя)т(о)го Романа к великои церкви, [288] в нюж(е) бяху събрани патриярхъ и вес(ь) клирос, народу безчисленно56 жен и дети. И пришед на площад(ь) то оу великия ц(е)ркви, и ссед с коня, и пад на землю лицемъ, и вземъ прьсть посыпана на главу свою, и благодаряше Б(о)га, и почюдис(я) оному ц(е)рковному зданию, и тако реч(е): «Воистинну люди сие быша и преидоша, а инии по сих лимъ подобнии57 не будуть». И поиде во ц(е)рков(ь), и вниде58 мрьзость запустения во стелище Б(о)жие, и ста на месте с(вя)темъ его. Патриярхъ же, и вес(ь) клирос, и народ безчисленно възопиша, со слезами и рыданми падоша пред ним. [л. 525] Онъ ж(е) безб(о)жьныи Магметъ, помаавъ59 рукою, да престаноуть от вопля, и реч(е) имъ: «Тебе гл(агол)ю, Анастасие, и все дружине твое, и всему народу. Поднешнии вперед к тому, не оубоитеся гнева моег(о) и убииства ни пленения». И робратився60, реч(е) пашамъ и санчакбеем: «Да запретят всему воиску и всякому чиноу моих вратъ, да не даютъ вес(ь) народ градскии, и жен, и детеи ни оуиствомъ, ни пленениемъ, ни иною ни которою враждою не вредятъ. Аще ли кто преступитъ нашего повеления, слово см(е)ртью да оумретъ». И повеле, да вышлютъ всех из ц(е)ркви. И виде людеи изшедших из ц(е)ркви полну на площад(ь), и вси оулицы идущих много, и оудивися толико народу от единыя храмины изшедшимъ, имже не бе числа. И поиде ко ц(а)р(е)ву двору и ту срете его некии сербин.
О ц(а)р(е)ве главе.
Принесе безбожному Магмету гл(а)ву бл(а)говерного ц(а)ря Костянтина, он же окоянныи возрадовася зело и вскоре повеле позвати бояр и стратиг, и воспроси их, да рекут ему истинну: «Аще то ес(ть) гл(а)ва ц(а)р(е)ва?». Они ж(е), страхомъ обдержими, рекоша ему: «То ес(ть) сущая гл(а)ва ц(а)р(е)ва». Он же окоянныи, облобызав ю, реч(е): «Воистинну явил тя Б(ог)ъ миру, оуроди паче ж(е) и ц(а)ря почто всуе погибе». И посла ю к патриярху, да обложить сребромъ и златомъ и сохранить ю, яко самъ весть. А триярхъ61 ж(е) вземъ бл(а)говернаго ц(а)ря Костянтина гл(а)ву и положи ю в ковчег, [л. 525 об.]сребромъ и позлащени, и скры ю в великои ц(е)ркви под престолом. От ин62ых тако слышахом, яко оставше и суще их съ ц(а)ремъ оу златых вратъ, оукрадоша его тоя нощи, и отнесоша его в полату, и сохраниша и.
О испытании ц(а)р(и)ци.
О ц(а)р(и)ци же бывшю велику испытаню. Сказаша салтану, яко великии дускъ и великии доместикъ и братанич его Осан Фома Палеолог, и епархъ градскии Николаи отпустиша ц(а)р(и)цу в кораблех, и абие стязав их мног(о), и повеле их казнити см(е)ртию; и симъ тако бываемым и сице совершаемых грех ради н(а)ших. Беззаконныи же Магметь седе на престоле ц(а)рьском Костянтина града, бл(а)городнеиша суща всех градов, иже под с(о)лнцемъ изобл(а)годаше владеющих двема части Вселенныя, и одоле одолевших гордаго Артаксексия; не вместима пучинами морскими, и вояводя ширя земля, и потреби потребиших Троию предивную, седмьюдесятми и черырми крали обороняему. Но оубо да разумееши окоянне, аще вся преж(е)реченная Мефодиемъ Патрьским, и двом пр(е)м(у)дрымъ, и знамения о граде семъ свершишас(я), то и последняя не преидуть, но також(е) свершитись; имуть пишет бо рускии, иж(е) род со преж(е)создателными всего Измаилта победятъ и Седмохолмаго приимуть со прежде законми его, и в немъ воц(а)рятся. [л. 526]

Текст воспроизведен по изданию: Повесть о взятии Царьграда // Новгородская летопись по списку П. П. Дубровского (Полное собрание русских летописей. Т. XLIII). М., 2004, С. 278 – 289.

1 Слова: Взят(и)е… Маг написаны вязью.

2 Так в ркп.

3 В ркп. н Испр. из ь.

4 Написано без титла.

5 Испр.; ркп. пртриярхъ.

6 Написано дважды, второй раз под титлом.

7 Так в ркп.

8 Так в ркп.

9 Испр.; ркп. рвые.

10 В ркп. ск испр.

11 Так в ркп.

12 Так в ркп.

13 Так в ркп.

14 Испр.; ркп. наша.

15 Написано без титла.

16 Испр.; ркп. бритие.

17 Так в ркп.

18 Так в ркп.

19 Испр.; ркп. влазязяху.

20 Испр.; ркп. пушешным.

21 Так в ркп.

22 Так в ркп.

23 Так в ркп.

24 В ркп. е зачеркнута и снова подписана сверху.

25 Так в ркп.

26 Так в ркп.

27 Испр.; ркп. сурово.

28 Испр.; ркп. торки.

29 Испр.; ркп. сташно.

30 Так в ркп.

31 Написано дважды.

32 В ркп. испр. из грехомъ (омъ зачеркнуто).

33 Испр.; ркп. патриар.

34 Написано дважды.

35 В ркп. испр. из твоег(о).

36 Так в ркп.

37 В ркп. испр. из бо.

38 Испр.; ркп. држиною.

39 В ркп. испр. из посвориша.

40 Написано без титла.

41 В ркп. позднее испр. на туму.

42 Написано на верхнем поле.

43 В ркп. испр. из чьрвленоу; ону зачеркнуто киноварью.

44 Так в ркп.

45 Так в ркп.

46 В ркп. испр. из Белиларбея.

47 Не вписан киноварный инициал.

48 Написано дважды.

49 Так в ркп.

50 Написано без титла.

51 Так в ркп., надо муж(е)ственне?

52 Так в ркп., надо обл(а)дают?

53 В ркп. неизреченными бл(а)годеяннии и неизреченными бл(а)годеянми.

54 Так в ркп.

55 Написано дважды.

56 Дальше в ркп. смертно.

57 Написано дважды.

58 Испр.; ркп. рвые.

59 Так в ркп.

60 Так в ркп.

61 Так в ркп.

62 Испр.; ркп. в голату.

Комментарии
Поиск
Только зарегистрированные пользователи могут оставлять комментарии!
Русская редакция: www.freedom-ru.net & www.joobb.ru

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."