| История России - История России до конца XVI в. |
Подлинник на пергамене; в некоторых местах подклеен бумагой; на обороте крупным почерком, современным грамоте: Се приехаша послы от Менгу Темеря цесаря[1] сажатъ Ярослава съ грамотою Чевгу и Баиши; другим почерком и обратно первой записи: Княжа Ярослава Ярославлич. Печать свинцовая круглая на шелковом шнурке, повреждена; на одной стороне изображение св. Афанасия Александрийского; на другой - св. Федора Стратилата. Следы прикрепления еще двух печатей. ЦГАДА, Гос. Древлехр., отд. 1, рубр. III, № 3.
ДрРВ, I, № 1; СГГД, I, № 3; Сахаров, X, № 12 (литографированное воспроизведение первых 17 строк); Шахматов, О языке, сс. 241-243; Кутепов, с. 492 (фотомеханическое воспроизведение 38 строк). - Печать воспроизведена: Орешников, II, 10.
Основание датировки: сообщение Новгородской I летописи о мире с Ярославом под 6778 г., ранее зимы.
Благословление от владыкы, поклонъ от посадника Павше, и от всѣхъ старѣишихъ, и от всѣхъ меншихъ, и от всего Новагорода къ господину князю Ярославу. На семь, княже, цѣлуи хрьстъ къ всему Новугороду, на цѣмь то цѣловали дѣди и отець твои Ярославъ. Новгородъ ти дѣржати въ старинѣ, по пошлинѣ. Что волостии всехъ новгородьскыхъ, тѣхъ волостии, княже, не держати ти своими мужи, нъ держати мужи новгородьскыми; а даръ, княже, тобе имати от техъ волостии. А бес посадника ти, княже, суда не судити, ни волостии раздавати, ни грамотъ ти даяти. А кому волости роздаялъ Дмитрии съ новгородци и Александръ, братъ твои, тѣхъ волостии тобе без вины не лишати. А что ти, княже, пошло на Торожку и на Волочѣ: тивунъ свои дьржати на своей чясти, а новгородець на своей чясти. А въ Бежичяхъ тобе, княже, ни твоей княгыни, ни твоимъ бояромъ, ни твоимъ слугамъ селъ не держати, ни купити, ни даромъ приимати, и по всей волости Новгородьскои. А се, княже, волости новгородьскые: Волокъ съ всеми волостьми, Торжекъ, Бежиче, Городець Палиць, Мелечя, Шипино, Егна, Заволочье, Tpѣ, Перемь, Печера, Юграг Вологда. А в Русу ти, княже, ездити на третиюю зиму. А лѣтѣ, княже, ездити на Озвадо звери гонитъ. А в Ладогу, княже, слати осетрьникъ и медовара по грамоте отца своего Ярослава; а ту грамоту, княже, отъялъ еси, а та грамота, княже, дати ти назадъ. А в Ладогу, княже, ездити на третиее лѣто. А из Бежиць, княже, людии нѣ выводите въ свою волость, ни изъ инои волости новгородьскои, ни грамотъ имъ даяти, ни закладниковъ приимати ни твоей княгыни, ни бояромъ твоимъ, ни слугамъ твоимъ: ни смерда, ни купцины. А без виныти, княже, мужа без вины не лишати волости. А грамотъ ти не посужати. А пожне, княже, что твое и твоихъ мужь пошло, то твое и твоихъ мужь. А что былъ отъялъ дратъ твои Александръ пожне, то ти не надобе. А что, княже, грамоты посубилъ еси отца своего и брата своего, а свое грамоты подаялъ еси на ты грамоты, ты грамоты отъимати, а старые оправливати. А что, княже, братъ твои Александръ дѣялъ насилие на Новегородѣ, того ти ся отступите. А дворяномъ твоимъ, како пошло, погонъ имати: от князя по 5 кунъ, а от тивуна по 2 куне. А что, княже, мытъ по Суждальскои земли и въ твоей волости: от воза имати по 2 векши, и от лодье, и от хмѣлна короба, и от лняна. [12] А дворяномъ твоимъ у купчевъ повозовъ не имати, разве ратнои вести. А свободъ ти, ни мытъ на Новгородьскои волости не ставити. А на Имоволозьскомъ погосте куны ти имати и на Важаньскомъ. А что еси, княже, отъимъ у Кюрили Хотуниче,[2] далъ еси попу святаго Михаила, а городискымъ попомъ не пошло дани има[ти] на новгородьскомъ погосте, вдаи опять. А холопъ или роба почнеть вадити на господу, тому ти вѣры не яти. А на Низу, княже, новгородца не судити, ни дании ти раздавать А что, къняже, тобе было гнѣва на посадника и на всь Новгородъ, то ти, княже, все нелюбье отложити и от мала и от велика, не мщати ти ли судомь, ни чим же. А кто почнеть вадити к тобе, тому ти веры не яти. А про послы, княже, и про купче новгородьскые, что въ Костромѣ и по инымъ городомъ, то, исправивъ, пусти въ Новъгородъ съ товаромъ. А въ Немецьскомъ дворѣ тобе торговати нашею братиею; а двора ти не затваряти; а приставовъ ти не приста[в]ливати. А про полонъ, кто кде заточенъ, или человекъ, или конь русьскыи и новгородьскыи, то исправи. А село святои Софии исправи къ святой Софии. А до владыкы, отча нашего, гнѣва ти не держати. На томъ, господине, на всемь крьстъ цѣлуи къ всему Новугороду. А гости нашему гостити по Суждальскои земли безъ рубежа, по цесаревѣ грамоте. А судье слати на Петровъ день, тако пошло. А вывода, ти, княже, межи Суждальскою землею и Новъмьгородомъ не чинити. А что закладниковъ за Гюргемь на Торожку или за тобою, или за кн[я]гынею, или за мужи твоими: кто купець, тотъ въ сто; а кто смердъ, а тот потягнеть въ свои погостъ; тако пошло Новегородѣ, отпустите ихъ проць.
[1] В подлиннике: цря и под титлом: с; так и в последующих грамотах.
[2] Хотуниче написано крупнее, буквы стоят свободнее.
Текст воспроизведен по изданию: Грамоты Великого Новгорода и Пскова. — М.-Л.; 1949. С. 12 - 13.
| Комментарии |
|