Сия же повесть о начале ц(а)рьствующаг(о) града в лет(о) 5818.
Ц(а)рствующу в Риме б(о)госодетелному великому Костянтину Флавию со тщаниемъ великим от(о)всюду собрав от земъствованных хр(и)стиян и начатъ оукрепляти и разширяти веру хрестиянскую: ц(е)ркви Б(о)жия оукрашати, [л. 493 об.] а иные преславны воздвизати, а идолы сокрушати, домы их в славу Б(о)жию превращати; и к томоу законы многая оустави, яко идолския капища с(вя)т(ите)лем Х(ри)с(то)вымъ и хр(и)стияном точию владети и рядити, в среду ж(е) и в пя(то)к поститис(я) страстеи ради Х(ри)с(то)вых, а в н(е)д(е)лю празновати Воскресения ради Х(ри)с(то)ва; жидовом же отнуд(ь) ж(е)ртвы не творити, и на распятие не осужати никогож(е) неч(е)стия ради кр(е)ста Х(ри)с(то)ва, и раб не покупати никомуж(е) от них, и на златицах образ его писати, и бысть велия повсюду хр(и)стияномъ.

Въ (тринадцатое) лет(о) ц(а)рства его, советомъ Б(о)жиим подвизаемъ, восхоте создати град во имя свое и посла мужеи м(у)дрых въ Асию, и в Ливию, и во Европию на взыскание избрание преславна и нарочита места на создание таковаг(о) града. Онем же поискавшим тацых местъ и возвратившимся и сказоваху ц(а)рю различная, инои паче похвалиша ему Византию и Македонию. Он же прилежаше болма на Трояду мыслию, иде ж(е) всемирная победа быс(ть) грекомъ на фряги, и сице помышляющу ц(а)рю въ днии и в нощи слыша во сне глас: «В Византии подобаеть Костянтиноу граду создатис(я)». И абие ц(а)рь, возбоудився [269] от сна, вскоре посылаетъ в Византию магистров и градцких делателеи готовати место. Сам же ц(а)рь остави в Риме кесари два с(ы)на своя Консту и Костянтина, а с(ы)новца1 своего Адаманта посла во Вретанию. И поиде ц(а)рь с м(ате)рию своею Еленою в Византию, с нею ж(е) взял [л. 494] и жену свою Максиминоу ц(а)рицу, дщер(ь) Диоклитияна ц(а)ря, и с(ы)на своего Костянтина, и зятя своего Ликиния, и два брата своя, Долмата и Констяндиона, и Долматова с(ы)на Долмата ж(е), и Костаньдионовых два с(ы)на, Галоу и Оулияна. И пришед в Византию, виде на том месте седмь гор и глушиць морских много и повеле горы рыти, и нижняя места наполняти, и на глушицах столпы каменныя ставити, и на них свод сводити, и ровняти место; а самъ ц(а)рь пребывше в Византии.
Егда ж(е) оуготоваше место, собра ц(а)рь велможи и мегистан, сиреч(ь) земских кн(я)зеи и магистров, и начаша оумышляти, како быти стенам, и стрелницам, и вратом грацкым. И повеле размерити местъ на три углы на все странь по седми верстъ, тако бо место межю дву мор(ь): Чернаго и Белаго.
Знамение2. И се змии внезапу вышед из норы, потече по месту, и абие свыше орел спад змия похвати и полете на высотоу. Змии начате укреплятис(я) круг орла. Ц(а)рь же вси люди зряще на орла и на змия. Орел возлете изо очию на долгъ час, и паки явис(я) низ летящь, и паде со змиемъ на том же месте, понеж(е) одолен быс(ть) от змия. Людие ж(е), текше, змия убита, а орла изымаша. И быс(ть) ц(а)рь во ужасе велицеи, и созвав книжники и мудрецы, и сказа имъ знамение. Они ж(е), поразсудив, сказаша ц(а)рю: «Сие место Седмохолмы наречется, и прославится, и возвеличится во всеи вселеннеи паче ж(е) инех градов, но понеж(е) станет [л. 494 об.] меж дву морь, и бьен будеть, волнами морскими поколебим будеть. А орел есть знамение хр(и)стиянское, а змии — знамение бесерменское, и понеж(е) змии одоле орла, являетъ, яко бесерменство одолеетъ хр(и)стиянства; а понеж(е) хр(и)стияня змия оубиша, а орла изымаше, яко напоследок паки хр(и)стиянство бесерменства одолеетъ, и Седмахолмаго примуть, и в немъ воц(а)рятся».
Великии ж(е) Костянтин о семъ возмутися зело, но обаче повеле словеса их написати, а магистригов и градцких делател(е)и повеле разделите надвое; и единои стране повеле размерити градцкие стены и стрелницы и начаша делати, а другои стране повеле размерити оулицы и площади на римскии обычаи. И тако начать делати ц(е)ркви Б(о)жия, и двор ц(а)рскии и иные домы славныи велможамъ, и мегистраномъ, и всемъ сановникомъ, воды сладкие приводити.
В седмое ж(е) лето виде ц(а)рь мало живущих во граде, занеж(е) велик бе зело, и тако сотвори: послав из Рима, от инех стран собрав достославных велмож, и мегистанов, и сановникомъ со множествомъ людеи их ту приведе, и домы великия создав, даде имъ во граде жити со оустроением великимъ и ц(а)рьскими чины, якож(е) и своя домы и отечества имъ забыти. Създа ж(е) ц(а)рь и полату великую, иподрому предивную, и две поле оустрои, сиреч(ь) оулицы покровенныя на торгование, и назва град Новыи Римъ. Потом же созда ц(е)ркви преславныя: с(вя)тыя [л. 495] Софии, и с(вя)тых Ап(о)с(то)лъ, и с(вя)тыа Ирины, и с(вя)т(о)го Мокия, и с(вя)т(о)го арханг(е)ла Михаила, и иные ц(е)ркви3 многие. Постави ж(е) и пречюдныи он багряныи столпъ, егож(е) принесе моремъ из Рима треми леты до Ц(а)ряграда, зане велик бе и тяжокъ от моря ж(е) до торгу летомъ единымъ принесен быс(ть). И ц(а)рь часто прихожаше и злата людемъ много даяше брежен(ь)я ради, и положи основание 12 кошъ, ихже бл(аго)с(ло)ви Х(ристо)с, от древа ч(е)стнаго и животворяшаго и с(вя)тых мощеи на утвержение и съхранение предивнаго единокаменнаго оного столпа; и постави на немъ кумир, егож(е) принесе от с(о)л(не)чнаго града Пругиискаго, имущи на гл(а)ве 7 луч4. Також(е) иные вещи предивные и достохвалные принесе изо многих странъ и градов. И преоукрасив град воздасть ему ч(е)сть велию обновлением, и праздникы, и торжествы великими на многие дни. И тако устави, да зовется град тои Ц(а)рьградомъ. И быс(ть) радость велия во всех людех.
[Д]немъ ж(е)5 минувшем, паки ц(а)рь с патриархом и со с(вяти)т(е)ли събрав вес(ь) с(вя)тенническии чин, також(е) вес(ь) сиклитъ ц(а)рскии и множ(е)ства народа, створиша литию, молбы и моления, дающе хвалоу и бл(а)годарение всемогущеи живоначалнеи Троици, Отцоу и С(ы)ну и С(вя)томоу Д(у)ху, и пр(е)ч(и)стеи его Б(о)гом(а)т(е)ри. И предаша град и всякъ чин люцкии всес(вя)теи вл(а)д(ы)ч(и)ци Б(огороди)ци и Одигитрие, сиреч(ь) наставницы, гл(аголю)ще: «Ты оубо, всенеп(о)рочная Вл(а)д(ы)ч(и)це ч(е)л(ове)колюбивая ес(тес)твомъ сущи, не остави град сеи достояния Твоег(о), но яко м(а)ти [л. 495 об.] хр(и)стиянскому роду застоупи, сохрани и помилоуи его, наставляя и наоучая во вся времена, яко ч(е)л(ове)калюбивая и [270] м(и)л(о)стивая м(а)ти, яко да в немъ прославится и возвеличится имя великолепие Твоег(о) во веки». И вси людие рекше: «Амин(ь)», и бл(а)годариша ц(а)ря, и похвалиша добрыи его разум, еже к Б(ог)у желание.
Ц(а)рь же нужаше стратигов и градцких наказателеи храмы с(вя)тых и доми мирския созидати на исполнение гpaд(a), велможам же и мегистаном и всемъ нарочитым людем заповеда: аще что сподобится коеи степени ц(а)рскаго чину, да сотворитъ собе память достоиноу, дом да воздвигнет, или обител(ь) славну, или ино здание дивно, яко да населится град преславными делесы. Також(е) и по немъ ц(а)рствующи ц(а)ри и ц(а)рицы, кииж(е) во свое время подвизашес(я), вещь преславноу сотворити: ови оубо на взыскание и собрание стр(а)стеи Г(о)с(под)них и пр(е)ч(ис)тыи Б(о)гом(а)т(е)ри ризы и пояса, и с(вя)тых мощеи и б(о)жественых икон, но и того самого б(о)гом(у)жьнаго и нерукотвореннаг(о) образа, иж(е) есть отедеса, ови ж(е)на прибавление града и домов великих; инии ж(е)пакы на воздвижение с(вя)тых обителеи и храмов б(о)ж(е)ственых, якож(е) великии Оустиян ц(а)рь, и Феодосие великии, и ц(а)р(и)ца Евдокея, жена6 Раклия ц(а)ря, ины мнози. И тако наполниша град преславными и дивными вещьми, имже иногда бл(а)женныи Андреи Критскыи удивис(я), рече: «Воистинну град сеи [л. 496] выше слова и разума есть». Имъ ж(е)и пренепорочная Вл(а)д(ы)ч(и)це, М(а)ти Х(ри)с(то)ва Б(ог)а н(а)шег(о), во она времяна бяше ц(а)рствующии град сохраняющи и покрывающи, от бедъ сп(а)сающи и от недоисцелных напастеи пременяющи. Такими оубо великими и неизреченными бл(а)годеянми и дарованми пр(е)ч(и)стыя Б(огороди)ца сподоби7 град сеи, яко и всему миру мню недостоиноу быти. Но оуб(о) е(сте)ство8 наше тяжкосердо и нерадиво, яко неистовы. Юже на нас м(и)л(о)сть Б(о)жию и щедротъ его обращаемся, и на злодеяние и безаконие обращаемся, имиж(е) Б(ог)а и пр(е)ч(и)стоую Его М(а)т(е)рь разгневаем, и славы своея и ч(е)сти отпадаемъ, якож(е) есть писанно: «Злодеяние и безаконие превратить пр(е)ст(о)лъ силных». И паки: «Расточи гордыя мысли с(е)рдца их низложи9 силныя со пр(е)ст(о)лъ». Також(е) и сеи ц(а)рствующи[и] град неисчестными деянми и безаконми от толиких щедротъ и бл(а)годеянии пр(е)ч(и)стые Ег(о) Б(о)гом(а)т(е)ре отпадше, со т[м]очислеными бедами и различными напастьми многа лета пострада. Також(е) и н(ы)не, в последняя времена, грех ради наших, овогда нахожением неверных, овогда гладомъ и поветрии частыми, овогда ж(е) межуоусобными бранми, имиж(е) оскудеша силнии и обнищаша богати людие, и преуничижис(я) град и смирис(я) до зела. Сие ж(е) писание о ц(а)рьствующем10 граде до зде, и мы сие оставльше, да на преднее возвратимся. Аминь». [л. 496 об.]

Текст воспроизведен по изданию: Повесть о Царьграде // Новгородская летопись по списку П. П. Дубровского (Полное собрание русских летописей. Т. XLIII). М., 2004, С. 269 – 271.