История России - История России до конца XVI в.
Литовскому родоу починокъ. Перьвое1 Хвостъ, а с(ы)нъ оу него Волкъ, а оу Волка с(ы)нъ – Троен, а оу Троена – Витень, а оу Витена с(ы)нъ – Едиман. Аоу Едимана 7 с(ы)н(о)въ: 1. – Монтивид, 2. Наримантъ, 3. – Олгердъ, 4. – Евнутии, 5. – Кестутеи, 6. – Корьят, 7. – Любортъ.
Едимана Литовскаго было 7 с(ы)н(о)въ. Стареишии Мантивид. Потомъ Наримантъ. Потом Олгердъ, королев от(е)ць. Потомъ Евнутии, потомъ Кестутии, о(те)ць великого кн(я)зя Витовта. Потом Корьят. Седмыи Лютортъ. Монтивиду ж(е)от(е)ць дал Корачев да Слоним. Наримонту – Пенескъ. Олгерду, королеву отцу – Крев. Да к томоу княз(ь)2 Витепскии с(ы)н(о)въ не держал.
А принях Олгерда в Витепскъ к дочере своеи, а себе взяти. А Евнутия осади в Вилне на великом кн(я)жении. А Кестутию дасть Трокы, Корияту – Новгородокъ Литовскии. А Люборта принял володимерскии кн(я)зь Коречь. Володимеръ – в Лучоскъъ во всю землю Волынскую. А Олгердъ – королев от(е)ць Кестутеи, а великого кн(я)зя о(те)ць – Кестоутеи.
Были в великои м(и)л(о)сти властець кн(я)зь велики Евнутеи и в болньшистве не полюбился братие и смолвиша межю собою братия, кн(я)зь великии Олгердъ, кн(я)зь велики Кестутеи, как бы брата своего Евнутья с великого княжества [л. 485 об.] высадить, никому б меж их не сести; и смолвиша межю собою братия срокъ оучинити которог(о) дни: к Вилне пригонити и засести Вилну под братомъ своимъ, великимъ кн(я)земъ Евнутием. Кн(я)зь велики Олгердъ из Витебска к тому сроку не поспел. Кн(я)зь велики Кестутеи пригнал къ городу к Вилне и въгна в город. И кн(я)зь велики Евнутеи, выскочив из Вилны, убежитъ в горы в Угры и тамо озябеть и ознобиси ноги. И туто его яша и привели к великому кн(я)зю Кестутию. Кестутеи изожда брата своего великог(о) кн(я)зя Олгерда. И Евнутья посади за сторожею. И против брата своего, великог(о) кн(я)зя Олгерда, гонца послал. А то оуж(е) Кестутеи и в Вилне сидел, а брата своего Евнутья ял. Гонецъ ж(е)великого кн(я)зя Олгерда встретить в Кракове и сказа то великому кн(я)зю Олгерду. Кн(я)зь велики Олгердъ борже поспеши къ брату своему великому кн(я)зю Кестутию к Вилне и какъ приехал. И кн(я)зь велики Кестутеи реч(е) брату своему, великому кн(я)зю Олгерду: «Тебе, Олгердъ, брате, подобаетъ быти в Вилне великимъ кн(я)земъ: ты мне стареишии братъ, за тобою заодно живу». Посади Кестутеи Олгерда на великомъ кн(я)жении в Вильне. И Евнутию дал Ниж(е)славль. И докончаютъ меж собя кн(я)зь велики Олгердъ и кн(я)зь велики Кестутеи.
То брате всемъ мощно быти [л. 486] у великого кн(я)зя Олгерда, что будеть городов и волостеи, то имъ себе наполы делити и быти имъ до живота в любви и в великои м(и)л(о)сти. Правду меж собя дали на томъ, что ни одному ни на одного лиха не мыслити и как был в тои прораде и до живота. Оу великого ж(е)кн(я)зя Олгерда было двенатцат(ь) с(ы)н(о)въ, а у велико кн(я)зя оу Кестутия 6 с(ы)н(о)въ; и межи всех с(ы)н(о)въ любимъ княз(ь) велики Олгердъ с(ы)на своег(о) Егаила, а кн(я)зь велики Кестутеи полюби с(ы)на своег(о) Витовта. И нарекли при своих животех, что имъ быти после их на их местех на великих кн(я)жениях. А Ягаило и Витовтъ промежи собою також(е) были в великих дружбах, какъ от(е)ць их. Потомъ паки княз(ь) велики Олгердъ умре, а кн(я)зь велики Кестутеи не оставя брата своего, великого кн(я)зя Олгердова слова, что и до его живота во единачествъ были: «Почтемъ дръжати великимъ кн(я)земъ в Вилне Олгердова с(ы)на Ягаила от после Олгерда, а почтетъ паки приеждати ко старым думамъ, какъ к брату своемоу3 еж(е) живал к стареишинам».
Некто паки был оу великого кн(я)зя оу Олгерда паробокъ неволнои холоп, звали его Воиниломъ, первое был пекраком4. Потомъ оуставил его у собя постелю стлати и воды пити подати собе. Потомъ паки полюбился был ему велми, дал бых ему литу дръжати и повелел был его [л. 486 об.] в добрые. Потомъ в животе не стало великого кн(я)зя Олгерда лета 2 или болши или межшиминоуло. Кн(я)зь же велики Ягаило поведеть того Воинила велми в высокие и дас(ть) за него сестру свою родную, княгиню Мар(ь)ю, что была за кн(я)зем Д(а)в(ы)дом. Се слышав, кн(я)зь велики Кестутеи ярости и жалости наполнис(я), что великии княз(ь) Ягаило свою сестру, а его братану дал за своего неволного холопа. И был тотъ Воинило в моци у великог(о) кн(я)зя Олгер(да) Ягаила. И потомъ Воидило почал собе с немцы со имы чинтии и записыватис(я)5 грамотами против великог(о) кн(я)зя. Некьто пакы был островскии купепъ, звали его Гнупыномъ. Тотъ Гнупын у великого кн(я)зя Кестутия кр(е)стил княгиню Янушеву, а его дочер(ь).
И скажетъ великому кн(я)зю Кестутию: «Ты того не ведаеш(и), какъ княз(ь) велики Ягаило посылаетъ к нам часто Воидила, а оуж(е)записалися с нами, какъ тобе избыти своих местъ емоу ся бы то достало твои [265] места». Кн(я)зь великии Кестутеи оуведав, что сын его, княз(ь) велики Витовтъ, гораздо живетъ великимъ кн(я)земъ Ягаиломъ. И почнетъ жаловатис(я) с(ы)ну своему, великомоу кн(я)зю Витовту: «Ты со Ягаилом живеш(и) гораздо, а он оуж(е)записался с немцы на нас». И кн(я)зь велики Витовтъ отвещаетъ отцу своему: «Не верую тому, нетъ того. Живетъ он со мною он гораздо, [л. 487] где бы мне того не явил». И потом пакы великое знамение учинилос(я). Княз(ь) велики Ягаило дал был Полтескъ брату своемоу, кн(я)зю Скиригаилу, и полочане его не прияша. Кн(я)зь велики Ягаило пошлетъ рать свою в Литовскую землю и Рускую з братомъ своимъ, со кн(я)зе Скиригаиломъ, и Полоцку. И оттуду магистрии Вифлянскои придетъ к Полоцку ж(е) оступять град. И кн(я)зь велики Кестутеи опять начнет жаловатис(я) с(ы)ну своему, великому кн(я)зю Витовту, а боле проплакивая, на великог(о) кн(я)зя Ягаила: «За Воидила сестру свою дал, а мою братаню из немецъ. Ми явленно, что немцы записалися на нас». И се паки третьее с ним ся мы воюемъ с немцы, и немъцы с ними Полоцка добываютъ оуже то проявилос(я), что оне с немцы дополна на нас стали. И кн(я)зь велики Витофтъ отвечаетъ отцу своему, великому кн(я)зю Кестутию: «Еще тому не веряю гораздо».
И речетъ княз(ь) велики Витофтъ, а самъ поедетъ къ городу къ Дорогочину. И кн(я)зь велики, паки Кестутеи, собрався съ своею мочию. Иже нетъ к городу Вилне иметъ великог(о) кн(я)зя Егаила и с м(а)т(е)рию6 и з братиею и грамоты тые из наидеть, что с немцы записалис(я), и пошлеть гонца къ с(ы)ну своему, великому кн(я)зю Витовту, к Дорогочину, что таковы дела сталис(я); и гонецъ тои наидетъ великого кн(я)зя в Городне, а кн(я)зь велики7 [л. 487 об.] Витофтъ оуж(е) з Дорогочина к Городню приехал, и княз(ь) велики Витофтъ одного дни из Городня поспеетъ ко отцу своему, к великому кн(я)зю Кестутию. Кн(я)зь же велики Кестутеи реч(е) с(ы)ну своему, великому кн(я)зю Витовту: «Ты мне не верил. И тые грамоты во се, что записалися были на нас с немцы. Но Б(о)гъ нас остерег за то, что яз великому кн(я)зю Ягаилу ничего не доспелъ и н(ы)неча не рушил есми ни скарбу его, ни стад его. Сами оу меня в нятстве ходять, толко за малою сторожею о(т)чину его Витепскъ, и Краков, и в(с)я места, что о(те)ць его дръжал, то все ему даю, ни во что в них не вступаюс(я), а то все учинил есмь, стерега своеи гл(а)вы, почюв, что на меня лихо мыслит».
Се ж(е)чюв, кн(я)зь велики Ягаило велми возрадовался приезду Витовтову. И правду даетъ кн(я)зь велики Ягаило великому кн(я)зю Витовту и дяде своему, великому кн(я)зю Кестутию, что николи противу его не выти и за все быти в них воле про все. И кн(я)зь велики Кестутеи отпусти его с материю и з братиею и скарбомъ со всемъ сь его. И кн(я)зь велики Ягаило поидетъ8 к Хреву. И кн(я)зь велики Витовтъ проводить его до Крекова, и княз(ь) велики Ягаило поидеть ис Крева к Витепску. И как седе княз(ь) великии Кестутеи на Вилне на великое кн(я)жество, пошлеть два ч(еловека) к Полотъцу: одного в ратъ, а другого к городу; се ж(е)уведав, полочане [л. 488] возрадовалися, кликнули на рать; и люди ратные отступи от кн(я)зя Скиригаила, пошли к Вилне к великому кн(я)зю Кестутию. Княз(ь) Скиригаило пошел в Немцы в Вифланты с малыми слугами. И княз(ь) велики Кестутеи поиде к Новугороду Сиверскому, а с(ы)на своего, великого кн(я)зя Витовта, оставит в Витфи, идя к Новугороду к Северскому. И кн(я)зь велитъ Воидилавы вести великому кн(я)зю Ягаилу из Витепска, и было ти ж(е)с нимъ. То пак(и) княз(ь) великии Ягаило правду свою на борзе позабыл тамо, не пошел и наговорил наместницы Виленскии, Аню, Евоу, Ада засести Вилноу. И княз(ь) Витовтъ в то время в Троце был. И княз(ь) велики Ягаило из Витепска со всеми вои своими прижен к Вилноу; и кн(я)зь велики Витофтъ пошлеть к Новугороду Северскому ко отцу своему, великому кн(я)зю Кестутию, с тою вестию. И немцы, паки пруские, услышавше те дела, и моршалко Пруские земли поидетъ на помоч(ь) ратию к великому кн(я)зю Ягаилу велми наборзе. Какъ услышав то княз(ь) велики Витовтъ, что Пруские земли немцы и к Трокомъ ж(е) идуть9 ратию сниматис(я) с немцы. И княз(ь) велики Витофтъ ис Троков идеть к Городню, см(е)ртию своею как приступять къ Троком, кн(я)зь велики Ягаило, и Трокы дадутся ему. И кн(я)зь великии Кестутеи поидеть к Городню къ с(ы)ну своему, великому кн(я)зю Витовту [л. 488 об.], а жену свою вземъ пошлеть в Бересть, надеяся на кн(я)зя Януша, зятя своего, намазавского кн(я)зя.
А самъ княз(ь) велики Кестутеи поидетъ в Жемоть, а с(ы)на своего, великог(о) кн(я)зя Витовта, оставить в Городне. И княз(ь) Янушь, зять его Мазовецкои, забыв добро ц(е)стя своег(о), великого кн(я)зя Кестутия, и тещи своеи, и шури своеи, поидеть ратию к Дорогочину. Дорогочин возметъ, молебник возметь10, и ты городы осадить: Ару ж(е)извоюет, Каменець извоюеть, отступить к Берести тещу свою доставать. [266]
Берести ж(е)не добывше, поидеть проч(ь), осадив ты два города Дорогочин да Мелникъ. И кн(я)зь велики Кестутеи, собрав свою Жемоцкую землю и вси рати, поидеть к реце велии, а с(ы)нъ его, княз(ь) велики Витофтъ, собрав свою рать, поидетъ из Городня против отца своего. И соимутся на велии Вывоков на две мили, и тутъ перевется их рать за реку. И поидуть ко Троком, и пришед, отступятъ Трокы. И почюеть княз(ь) велики Кестутеи, что княз(ь) велики Ягаило из Вилна идеть ратию, а с ним немецкая рать вифляиская11. Ино первое немцы обоимъ неприятели были великому кн(я)зю Кестутию и великому кн(я)зю Ягаилу. И се первое на помощь вифлянская рать приходила кн(я)зю Скиригаилу к Полотцку. И потомъ с моршалкомъ пруская рать к Трокомъ приходила. То оуж(е) въ [л. 489] трет(ь)и вифлянская рать с ними приходила. То оуж(е) знаменаты вышли, шед с ними заодно, стали против великог(о) кн(я)зя Кестутия.
И выступить на бои кн(я)зь велики Кестутеи с(ы)номъ своимъ, с великим кн(я)земъ Витовтомъ, против великого кн(я)зя Ягаила к великово кн(я)зя рати Кестутьеве. Почнуть пытати великого кн(я)зя Витовта, чтоб Х(рист)ом с нимъ поговорили, почнуть говорити великому кн(я)зю Витовту: «Кн(я)зь велики Ягаило послал нас к тобе, чтобы еси ед(и)нал нас со отцемъ своимъ, чтоб Х(рист)омъ12 дръжали свое. И вы бы свое, межи бы нас не было кровопролития, и ты б(ы) приехал к брату своему, великому кн(я)зю Ягаилу, а мы правду даемъ, что тебе что от(ъ)ехати опять в рать свою, иж(е)ды бы межи нас было добро и конецъ». И княз(ь) велики Витовтъ отвещав: «Правду оу вас беру, чтоб також(е) княз(ь) Скиригаило семо приехал, також(е) бы правду дал, и вы я еду». И они послали ко кн(я)зю Скиригаилу, и княз(ь) Скиригаило такожде правду дал великому кн(я)зю Витовту, как они правду дали; и княз(ь) велики Витовтъ поехал к великому кн(я)зю Ягаилу и коег(о) рати и полкове стоятъ межю собе, не починая ничего. И кн(я)зь велики Ягаило учнетъ говорить великому Витовту13: «Чтоб еси межи нас единал, а кроваваго промежи нас не было». И княз(ь) велики Витовтъ правду взял оу великог(о) кн(я)зя Ягаила за отца своего; отцу его великому, кн(я)зю Кестутью, съехався и опять роз(ъ)ехатис(я), [л. 489 об.] еще реч(е) княз(ь) велики Витофтъ великому, кн(я)зю Скиригаилоу: «Еще, брате, пошли кн(я)зь Скиригаило, чтобы они дали бы правду отцу моему, иж(е) бы ему чисто приехати и опять от(ъ)ехати в рать». И кн(я)зь велики Скиригаило дал от себе правду.
И кн(я)зь велики Витовтъ со кн(я)земъ Скиригаиломъ поидеть ко отцу своему, великому кн(я)зю Кестутию, в рать, дас(ть) правду отцу своему от кн(я)зя Ягаила. Кн(я)зь Скиригаило дас(ть) правду от кн(я)зя великого и от собя, а кн(я)зь велики Витовтъ со отцемъ своимъ, с великимъ кн(я)земъ Кестутием, оба поедуть из рати, надеяс(я) на ты правды. Кн(я)зь же велики Ягаило, преступив сы правды, молвя: «Поеды к Вилне, тамо докончаемъ в томъ рати, ничего не чиня, починавше отстали».
Какъ к Вилне приехав, дядю своего, великого кн(я)зя Кестутья, поимав, оковал и послал в Креву, и всади его в вежю; великого кн(я)зя Витовта оставил был еще в Вилне. И тое нощи в Креве великого кн(я)зя Кестутия удавили коромолники великого кн(я)зя Ягаиловы: Ярошка, что воду давах емоу, был с нимъ мостев братъ Къкоучокъ Лисица и Бинтяи. Таков конецъ стался великому кн(я)зю Кестутью до см(е)рти пакъ великого кн(я)зя Кестутьеве. Поимаетъ княз(ь) велики Ягаило великого кн(я)зя Витовта с женою и пошлетъ их в Крев же, велитъ их твердо стеречи в комънате, и все-то имъ мстил Воидилову см(е)рть, [л. 490] чтоб Лисесту свою за него дали. И ту велитъ казнить великог(о) кн(я)зя Витофтовых людеи дву на колесех розбили, а одного Винтимонда да дядю великог(о) кн(я)зя Витовтова остави, что дръжал Оул(ь)яну княжноу, потомъ как была Оул(ь)яна на замонди видомъ, и иных бояр многих постинали. И все то мстя Воидилу см(е)рть.
Кн(я)зь велики пакъ Витофътъ сидел в Креве за крепкою сторожею, толко ходили к нему две жонки покладывать княгиню его, а пожаловав – вон поидуть, а сторожи около. И княгини Витовтова от людеи слышала, что кн(я)зю Витофту сидеть долго. Очь такъ загадаютъ, какъ стало над великимъ кн(я)земъ Витофтомъ Кестоутьемъ, что его оудавили. Пригадала великая кн(я)гини Витовтоу, какъ поидуть жонки покладывать, ино с однои жонки снят(и) платье, положить на собя и выти вон за другою жонкою, а ту жонку оставити туто, с которои платье сняв, и какъ его научила княгиня его. Кн(я)зь велики Витофтъ какъ нарядився в одное жонки платье, а з другою вышол вон и, спустися з города, оутече14 в земли в Пруские; бывшю же ему в немцех оу маг(и)стра и прияхша к нему мнози кн(я)зи и бояре литовские, он жо помочию немецкою нача воевати Литовскую землю. И великому кн(я)зю Ягаилу и Скиригаилоу оуж(е) от него добре нужно, и невозможно имъ против его стати. Занеж(е) оу великого кн(я)зя Витовта сила велика събралас(я). Кн(я)зь же велики Ягаило, [л. 490 об.] перезвав его из немець, дас(ть) ему Луческъ со всею Волынскою землею, а [267] в Литовскои земли отчину его короля Казимира Краковского, что ег(о) в животе не стало, а с(ы)н(о)въ у него было толко одна дочка Двига.
И начата ляхове слати ис Кракова к великомоу кн(я)зю Ягаилу, дабы принях кр(е)щение старог(о) Рима, понял бы оу них королевно у Ядвигу собе женою и стал бы у них королем в Кракове во все земли Ляцкои. Про то ж(е) княз(ь) велики Ягаило советъ сотвори съ своею м(а)т(е)рию, с великою княгинею Оулияною, и з братиею своею, и со всеми кн(я)зьми. И бояря Литовскии земли поеха х .Кракову в Ляцкую земли, и тамо самъ кр(е)стися, и братия его, и бояре, и кн(я)зи Литовскии земли; и поняв собе королевноу Ядвигоу, и корунован быс(ть) того кралства коруною. И оттоле не яше крестити в Литвоу в латынскую веру. Присла арцибискуп бискупа к Вилне в Литовскую землю, тое ж(е) зимы королю сущу в Кракове, тогда начата ставити костелы в Литовскую землю.
Тое ж(е) зимы королю сущю в Кракове со всеми кн(я)зи литовскими и княз(ь) Ондреи Полоцкии приде с немцы с вифлянскими со всею латынею на Литовскую землю. И повоевав мног(о) местъ, и сел, и пожог градомъ ж(е) в Литовскои земли, ничего не доспел и возвратис(я) восвоясы. Тое ж(е) зимы кн(я)зь Всеслав Смоленскои советъ сотвори кн(я)земъ Ондреем Полоцкимъ, а кн(я)зю Андрею в Литву, а кн(я)зю С(вя)тославу к Орши; и тоут миру [л. 491] хрестияномъ много зла створиша, не ч(е)л(ове)ч(е)скин и не хр(и)стиянскии моучиша мир. Таковых же м(у)къ ни на тотарских ратях не слыханно такова м(у)ч(е)ния, а хр(и)стиянство ж(е) збираху, и в ызбах запираху, и зжигаху их тако во злочинях хоромы, оч(е)пы подымаху и под стену людеи кладяху и сих зажигая, а иных жены и дети на коле тыкаху, и иных мук над кр(е)стияны мног(о) чиниша таковых, что сорома для нелзе было писати; також(е) ни Антиох Сирьскии, ни Оулиян Злыи закону преступникъ таких м(у)къ над хр(и)стияны не тваривали. Граду ж(е)Орши ничтож(е) не створиша, возвратишася восвоясы.
Тое ж(е) зимы на весну в Великие говение нача С(вя)тослав думати съ смоленскими бояры на пролитие хр(и)стиянския крови, аки самъ не хр(и)стиянин, толко кроливецъ, поиде к городу ко Мъстиславлю и ста под городомъ Мстиславлен нач(а) града добывати и порокы бити. Град в землю Мстиславскую вои поустил мног(о) пролития крови хр(и)стиянские, доспел того ж(е) быс(ть) Б(ог)у мръзко зрети, а то С(вя)тослав, зовучися хр(и)стиянином, а братию свою хр(и)стиян тако зло мучаху. Княз(ь) же велики Скиригаило и кн(я)зь велики Витофтъ приехавше из Ляхов от брата своего от короля. И слышав, что С(вя)тослав Смоленскои преж(е) был под Витепскомъ и потомъ под Оршею, а н(ы)неча15 стоитъ под Мстиславлем, град биетъ порокы. И сжалився кн(я)зь велики Скиригаило. Поиде з братиею своею, [л. 491 об.] с великим кн(я)земъ Витофтом, с Контянтином, и с Корбутом, и с Семеном Лугвеном. И помянуша слово Б(о)жие, еж(е) реч(е): «Коею мерою меритъ ч(е)л(ове)къ, то отмерится ему; што всеетъ, то и пожнетъ. Мы емоу никоего зла не створихом, а он самъ в докончании будучи, преступив кр(е)стное целование, и докончание нашу землю пленуетъ и кров(ь) хр(и)стиянскую проливаетъ; мы ж(е) поидем на него, надеяс(я) на Б(ог)а, на хр(и)стиянскую силоу поидоша ко граду Мстиславлю». Кн(я)зь С(вя)тослав eщe стоит оу града и бияша пороки град Мстиславль на кр(е)стнои н(е)д(е)ли в пятницу.
То ж(е) слышав кн(я)зь С(вя)тослав, что идеть на него княз(ь) велики Скиригаило з братиею. Онъ ж(е), исполнив воя своя, поиде против имъ, и съступишася полцы. Б(о)гъ же по Д(а)в(и)да прор(о)ка слову створи, еж(е) реч(е): «Обратится болезнь его на гл(а)ву его, и на верхъ его неправда его снидеть». Б(о)гъ поможетъ великомоу кн(я)зю Скиригаилоу и великому кн(я)зю Витофтоу. И кн(я)зь С(вя)тослав16устремися на бег съ своими княз(ь)ми и бояры смоленскими и своими ратьми.
Б(о)жиею м(и)л(о)стью то немало чюдо створис(я): избито быс(ть) вои много, множ(е)ство кн(я)зеи и бояр С(вя)тославовых, и самого великог(о) кн(я)зя С(вя)тослава биша, с(ы)на же его, кн(я)зя Юр(ь)я, кн(я)зь великии Скиригаило обрете в трупех много ранена, толко то жив; взя его и нача его лечити, главу емупостриже ран для, занеж(е) много ранен отчаял был собе живота. Княз(ь) [л. 492] же велики Скиригаило исцелил его от ран, и привез его къ городу Смоленску и м(а)т(е)ри ег(о) великои княгине С(вя)тославове, и посади его на великомъ кн(я)жении на Смоленскомъ, занеж(е) бысть за кн(я)земъ Юрьемъ д(о)щи стареишои сестры Скиригаилове.
Отшед от града Смоленска кн(я)зь велики Скиригаило и поиде во свою землю Литовскую и нач(а) кн(я)жити во Троцех, а в Вилну прислал от собя старосту ляцкого. А великому кн(я)зю Витофтоу, тогда [268] держащу Лоуческъ и всю землю Волынскую, в Литовскои земли отчину свою. И быс(ть) ему ноужно чего не бывало в Литовскои земли, что староста владеетъ великъ кн(я)жениемъ. Тогда советъ сотвори со многими княз(ь)ми и бояры Литовские земли. Кн(я)зь же велики Скиригаило от(ъ)еха в Полоцко. И кн(я)зь велики Витофтъ прииде в Вилну, хотя ю засести, а великая княгиня Анна – в Городне. Виленцы ж(е) тогда не дашася ему, зане бы тогда правду дал королю Скиригаилоу, он же тогда не возмя Вилне и поиде к магистру и с своею княгинею и съ своими княз(ь)ми, со многими бояры и оттоле нача воевати Литовскую землю с немецкою помощию; ти оуж(е) взял бы Литовские земли по реку по велию Полотескъ град здался ему, и оузри корол(ь) и княз(ь) велики Скиригаило, что оуж(е) невозможно дръжати земли Литовские пред великимъ кн(я)земъ Витофтом. И поиде княз(ь) Витовтъ с немецкими силами [л. 492 об.] к Вилне.
И сретес(я) кн(я)зь велики Скиригаило з братом своим, великимъ княземъ Витовтомъ, с литовскими вои на реце на вели у городка, на мести, нареченомъ Веишкушки. И стоупившимся полкомъ, и Б(о)гъ поможет виликомоу кн(я)зю Витовту, и, побежени быша, литовские вои устремишас(я) на бег, и побито быс(ть) многое множ(е)ство, а иных бояр и кн(я)зеи17 поимали: кн(я)зя Семена Евнутьевича и иных кн(я)зеи, и кн(я)зя Глеба С(вя)тославича Смоленского, и кн(я)зя Васил(ь)я Костянтиновича, и кн(я)зя Ивана Теплюплаксича, и иных много быс(ть) изыманно. И поиде княз(ь) велики Витовтъ паки къ городу к Вилне своими вои и оступи град Вилно, нача добывати град пушками и взя град. Тогда ж(е) немцы убиша кн(я)зя Скиригаила. Кн(я)зь же велики, возмя град и землю, извоевал и возвратися18 опят(ь) в Немцы.
Того ж(е) лета к великому кн(я)зю Витовту в Немцы и в Марин город приидоша послы из града Москвы от великого кн(я)зя Васил(ь)я Дмитриевича: просятъ дщери великог(о) кн(я)зя Витовтовы за великого кн(я)зя Васил(ь)я Дмитреевич(а). Кн(я)зь же велики Витовтъ дас(ть) дщер(ь) свою, княжноу Софию, за великого кн(я)зя Московского и отпусти ю из града из Марина, а с нею посла кн(я)зя Монтивича из града Данска; и поидоша вси корабли за море и приидоша ко граду Пскову; псковичи ж(е) великие ч(е)сти воздаша им и проводиша [л. 493] их с честью до Новагорода; и новгородцы ж(е) паки имъ ч(е)сть воздаша и проводиша их до града Москвы с ч(е)стию к великомоу кн(я)зю Васил(ь)ю Дмитреевичю. Кн(я)зь же велики Василеи противу их послал с честию братью свою, кн(я)зя Ондрея Володимерович(а), и кн(я)зя Юрья Дмитреевич(а), и иных многих кн(я)зеи и бояръ, и сретоша княжноу Софию с великими ч(е)стьми. Тогда с(вя)щенныи митрополитъ Киприян со архиеп(и)с(ко)пы, и со еп(и)с(ко)пы, и со всемъ с(вя)щеннымъ соборомъ стретили ч(е)стно со кр(е)сты пред градомъ Москвою и сотвори бракъ и венчали великог(о) кн(я)зя Васил(ь)я Дмитреевича с великою княгинею Соф(ь)ею, и быс(ть) бракъ чюден. Кн(я)зю ж(е) великомоу Витовту, еще бывшю в Немцех, умолиста его присла к нему корон(у) з братомъ своимъ Скиригаилом и р(е)кучи: «Болши тог(о), брате, не теря земли Литовские, отчины нашея и своеи, а поиди к намъ в мир в великую любов(ь), в братъство, возми собе великое кн(я)жение в Вилне, стол дяди своег(о), великог(о) кн(я)зя Олгерда, и отца своего, великог(о) князя Кестут(ь)я, амин(ь)».

Текст воспроизведен по изданию: Литовскому роду починок // Новгородская летопись по списку П. П. Дубровского (Полное собрание русских летописей. Т. XLIII). М., 2004, С. 265 – 269.

1 Слова Литовскому…перь написаны вязью.

2 Испр.; ркп. кназ(ь).

3 Испр., ркп. сввоему.

4 Так в ркп.

5 Испр., ркп. записываватис(я).

6 Написано без титла.

7 Испр.; ркп. вевелики.

8 Испр.; ркп. попоидетъ.

9 В ркп. испр. из идеть.

10 Так в ркп.

11 Испр.; ркп. фиплянская.

12 Написано без титла.

13 Испр.; ркп. великовту.

14 В ркп. испр. тем же почерком из утесе.

15 Написано без титла.

16 Написано без титла.

17 Написано без титла.

18 Испр.; ркп. возвритися.

Комментарии
Поиск
Только зарегистрированные пользователи могут оставлять комментарии!
Русская редакция: www.freedom-ru.net & www.joobb.ru

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."